Ел экономикасының дамуы кәсіпкерлік саласының жетілуіне де байланысты екені белгілі. Мемлекет тарапынан көрсетілген қамқорлыққа сүйене отырып, өзі ұнатқан кәсібін таңдап, қоғамда сұранысқа ие өнім өндіріп, өзіне де, өзгеге де пайдалы іс тындырып отырған қарапайым қыз-келіншектер Тарбағатай ауданында да жеткілікті.
{jcomments on}Солардың қатарында ақсуаттық кәсіпкер Нұргүл Оралбаева мен Жетіарал ауылының тұрғыны Аяулым Серікова да бар. «Жұмыспен қамту – 2020» бағдарламасы негізінде несие алып тірлігін жасап, кәсіп-орын ашып, халыққа адал қызмет етіп, көпшіліктің алғысына бөленіп отырған Нұргүл мен Аяулымның кәсіпкерлік жобалары жайлы арулардың айтулы мерекесі қарсаңында ақпарат берудің реті келіп тұр.
Нұргүл Оралбаева Екпін ауылында тұрады. Ақсуаттағы орталық базардан шағын орын алып, тігін цехын ашқан. Жоғарыда аталған бағдарлама бойынша бір миллион теңге несие алып, оған 3 түрлі іс тігетін машина сатып әкеліпті. Қазір ол, негізінен, қазақтың ұлттық киімдерін, үлкендерге арналған шапаннан бастап қыз балалардың би көйлегіне дейін тігеді. Тапсырыс болса, ою-өрнегін әдемілеп салып отырып көрпе мен жастық та жасайды.
— Іс тігу өнерін жас кезімде Зейнеп әжемнен үйренген едім. Ол кісі өте ісмер, тігінші адам болған. Сол кісінің өнегесін көріп өсіп, тігіншілік кәсіпті меңгеріп алдым. Осы мамандықты таңдағаныма өкінбеймін. Әртүрлі киімге тапсырыс беріп, дайын болған киімді қабылдап алған адамдардың қуанғанын көрудің өзі бір ғанибет. Соңғы кезде тапсырыс берушілер көбейіп келеді. Соған байланысты қасыма бір көмекші алсам деген ойым бар. Кәсібімді дамытып, өндіретін өнімімнің сапасын жақсарта түсуді мақсат етіп отырмын. Еңбектің ырыздығы мен қызығын көру — үлкен бақыт,- дейді Нұргүл Оралбаева.
Еңбексүйгіштігімен, іскерлігімен ауылдастарына танылған Аяулым Серікова Жетіарал ауылында кондитерлік өнімдер шығаратын цех ашып, нан, тоқаш, бауырсақ пісіреді. Ауылдастары тапсырыс берсе, түрлі-түрлі торт жасайды. Ұннан жасалатын басқа да тәтті-дәмділерде есеп жоқ. Аяулымның өнімдері ауылдық округке қарасты Асусай, Қамысты, Жалғызтал ауылдарына дейін таралып, саудаланып жатады.
— «Жұмыспен қамту – 2020» бағдарламасы шағын кәсіпорын ашып, мен сияқты өзін өзі жұмыспен қамтуға талпынғандарға өте қолайлы болып отыр. Бағдарлама бойынша алған қаражатыма нан, тоқаш пісіретін құрал-жабдықтар сатып алдым. Көмекшім Рабиға Досанова екеуіміз цехтың жұмысын біршама дұрыс жолға қойдық. Шығарған өнімдеріміз жұртшылықтың талап-талғамына лайық болса екен деп, уақытпен санаспай жұмыс істейміз,-дейді Аяулым Серікова.
Аяулым таяуда «Нұр Отан» партиясының қатарына өз өтінішімен қабылданған екен. Жігерлі жастың алдағы уақытта да ауылдастарын жақсы істерімен қуанта беретініне сенеміз.
Хамза СӘТИЕВ,
«Семей таңы»
