Бүгінгі күні ерлер мен әйелдердің еңбек нарығында терезесі тең екені даусыз. Жеке кәсібі ілгері басып, кәсібінен нәсіп тауып жүрген кәсіпкер әйелдер қазір қоғамның мықты тірегіне айналып отыр. Бесқарағай ауданында еңбегінің жемісін көріп жүрген, алға қойған міндеті мен көздеген мақсаты айқын, аудан экономикасының дамуына өзіндік үлес қосып отырған азаматшалар аз емес. Солардың бірі – Мейрамгүл Биғожина. Ол 1967 жылы 9 мамырда Көкпекті ауданы Үлгілі малшы ауылында дүниеге келген. Қарапайым әрі көпбалалы отбасында тәрбиеленген Мейрамгүл апай туған ауылында Абай орта мектебін тәмамдағаннан кейін хореограф мамандығын меңгереді. Ең алғашқы еңбек жолы 1985 жылы Бесқарағай аудандық Мәдениет үйінде басталса керек. Іс-тәжірибеден өтуге келген жас маман 1986 жылы отбасын құрып, осыдан бастап Бесқарағайдың келіні атан- ған екен. 1987-1999 жылдар аралығында клуб меңгерушісі, «Малыши» балалар бақшасының тәрбие-шісі, жұмыспен қамту бөлімінде жеткізуші, типография есепшісі және директоры қызметтерін де атқарған. Содан 2000 жылы Мейрамгүл Мүшенқызы жеке кәсібін бастауға бел буады. Қазіргі уақытта аудан орталығында орналасқан оның дүкеніне бас сұқпаған аудан тұрғыны қалмаған болар. Бұл дүкеннен күнделікті тұрмысқа қажетті заттардың барлығын табуға болады. 13 жылдан бері тұрақты жұмыс жасап тұрған дүкеннің иесі:
{jcomments on}- Бастапқыда бұл дүкен кішкене ғана дүңгіршек болатын. Ең алдымен сол кездердегі сұраныс бойынша кеңсе заттары сатылды. Отырған орнымда жөндеу жұмысы мүлдем жүргізілмеген ескі ғимарат болатын. Құлаудың аз-ақ алдында тұрған ғимаратты жөндеуге ауқымды қаражат жұмсалды. Қосымша несие алып, ғимаратты бүгінгі жағдайға жеткіздік. 2006 жылы үй шаруашылығына қажетті заттар сатылатын дүкенімді аштым. Ғимаратта, сондай-ақ бөлмелерді жалға алып, өз кәсіптерін дөңгелеткен шаштараз, асхана, ломбард жұмыс жасайды, -дейді өз сөзінде.
Балалары Медет пен Анарды аялы алақанымен әлпештеп жеткізіп, болашақтарының жарқын болуы үшін, аянбай еңбектенген аяулы ана – отбасының тірегі. Бүгінгі таңда ұлын ұяға, қызын қияға қондырған Мейрамгүл Мүшенқызы мен Совет Жаңбыршыұлы — екі немере, екі жиен сүйіп отырған ата-әже. Осы күнге дейін аз қамтылған отбасыларға көрсеткен көмегі, мүмкіндіктері шектеулі балаларға танытқан қамқорлығы үшін бірнеше рет аудан әкімінің Алғыс хатымен марапатталса, 2011 жылдың қорытындысы бойынша «Жылдың ең үздік кәсіпкері» атанып, бағалы сыйлыққа ие болған екен. Еңбегі ескерусіз қалмай, өзіндей нәзік жандыларға үлгі бола білген Мейрамгүл Мүшенқызына денсаулық, шаңырағына шаттық, еңбегіне жеміс тілейміз.
Ә.ЗАИТОВА,
Бесқарағай ауданы.
