Semeytany.kz — Көкпекті ауданында елді мекендерді көркейту және тұрғындардың өмір сапасын арттыруға бағытталған жұмыстар жүйелі түрде жүзеге асуда. Аудан әкімдігінің мәліметінше, биыл жалпы құны 222,2 млн теңгені құрайтын 17 жоба аяқталды.
2024 жылы іргетасы қаланған бастамалар жалғасын тапты: өткен жылы Ажа ауылында воркаут алаңы, Көкпекті ауылында спорт алаңы салынған еді (жалпы құны – 20,9 млн теңге).
Биылғы кезеңде Биғаш, Үлкенбөкен, Жансары, Преображенка, Черноярка, Үкіліқыз, Теректі, Үшкөмей, Ақой, Қарамойыл, Толағай және Көкпекті ауылдарында балалар ойын алаңдары пайдалануға берілді. Сонымен бірге Биғаш, Ақой және Үлгілімалшы ауылдарында шағын футбол алаңдары ашылды.
Жобалар жергілікті тұрғындардың ұсыныстары негізінде әзірленіп, ауылдардың әлеуметтік инфрақұрылымын жақсартуға бағытталды. Нәтижесінде аудан бойынша балалар мен жастардың бос уақытын тиімді өткізуіне жағдай жасалып, бұқаралық спортты дамытуға жаңа мүмкіндік туды.
