Жеңістің 70 жылдығы қарсаңында соғыс ардагерлеріне дабыл түймесі бар арнайы ұялы телефондар сыйға тартылды.
{jcomments on}Арнайы ұялы құрылғы қалта телефонына ұқсас. Тек артқы панелінде дабыл тетігі орналасқан. Оқыс оқиға орын алған шақта, сол қызыл тетікті басса, телефон иесін тәулік бойы жұмыс істейтін республикалық көмек көрсету орталығымен байланыстырады. Орталық операторына әрбір ардагер жайлы мәлімет, ауыратын аурулары, медициналық дәрілер мен құрылғыларға қарсы көрсеткіштері, сонымен қоса ет жақындарының байланыс телефондары белгілі болады. Сондықтан да шұғыл көмек қажет сәтте ардагерлер «SOS» дабыл тетігін басса болғаны. Операторлар жедел жәрдем немесе қажетті шұғыл қызмет көрсету мамандарын ардагерге жөнелтеді. Сондай-ақ әр ұялы телефонда «Beeline» байланыс компаниясының сим-картасы да орналастырылған. Мұндай қалта телефондарының иелері бір-бірімен тегін байланысса, Қазақстан бойынша өзге желілерге сөйлесу құнында жеңілдіктер бар. Ал орталықтағы операторларға, бірлік болмаса да, тіпті сим-карта жұмысы тежеуде болса да, хабарласу мүмкіндігі бар. Құрылғы қарапайым әрі тетіктері үлкен, ыңғайлы болуымен ерекшеленеді. Және радиоқабылдағышы мен жарықтандырғыш шам бар. Елбасының тапсырмасына сәйкес, мұндай құрыл-ғымен еліміздегі барлық соғыс ардагерлері Жеңіс күніне дейін толық, тегін қамтамасыз етілмек.
Қаладағы соғыс ардагерлеріне ұялы құрылғыларды салтанатты табыстау рәсімінде қала басшылығы атынан сөз алған қала әкімінің орынбасары Зәуреш Исабаева ардагерлерді келе жатқан Жеңістің 70 жылдығымен құттықтап, дендеріне саулық тіледі. Өз кезегінде ардагерлер де риясыз ризашылықтарын білдірді.
— Үнемі бізді назарында ұстап, қолдау көрсетіп отыратын Елбасымыз Нұрсұлтан Әбішұлына, қала басшысына айтар алғысымыз шексіз. Біз сын сағаттарда қандай патриот болсақ, өміріміздің соңына дейін солай болып қаламыз. Мемлекеттігіміз мығым болып, еліміз көркейе берсін. Келер ұрпағымыз да бейбітшілікте баянды ғұмыр кешсе екен деген арманымыз бар, — деген соғыс ардагері Виктор Соколов қатарластарына дабыл тетігін басатын оқыс жағдай орын алмасын деген тілегін жеткізді.
Әйгерім СӘРСЕНҒАЛИ,
«Семей таңы»
