Өткен аптада қала әкімдігінің мәжіліс залында қала әкімі Айбек Кәрімовтің төрағалық етуімен әкімдіктің отырысы өтті.
{jcomments on}Жиынға қала әкімінің орынбасарлары, дербес бөлім басшылары, кент, ауылдық округ әкімдері, мекеме, кәсіпорындар басшылары, бұқаралық ақпарат құралдарының өкілдері қатысты. Басқосудың күн тәртібінде қаралған бірінші мәселесі бойынша Қазақстан Республикасы Президентінің 2014 жылғы «Нұрлы жол – болашаққа бастар жол» Жолдауының іске асырылу барысы туралы ішкі саясат бөлімінің басшысы Айдар Садырбаев баяндама жасады.
«Ішкі саясат бөлімімен ұйымдастыру-әдістемелік іс-шаралар бойынша тиісті жұмыс атқарылды», — деген бөлім басшысы А.Садырбаев, аталған бағытта жұмыс жасау мақсатында ақпараттық-насихаттау топтарын қайта қалыптастыру жүргізілгенін атап өтті. Оның айтуынша, бүгінгі күні қалада қалалық мәслихат депутаттары, ұйымдар, мекемелер мен кәсіпорындар басшылары, ғалымдар мен зиялы қауым, азаматтық институт өкілдері, БАҚ өкілдері және жастар арасынан 361 адам құрамына кірген 67 топ жұмыс істеуде.
— 2015 жылғы 20 ақпандағы жағдай бойынша әртүрлі деңгейдегі ақпараттық-насихат топтары 51,5 мың адамды, немесе жалпы халық санының 15,1 пайызын қамти отырып, 347 іс-шара өткізілді. Тұрғындармен өтетін кездесулер сияқты дәстүрлі іс-шаралардан бөлек, жергілікті басылымдар мен электронды БАҚ, сондай-ақ әлеуметтік желілердің де әлеуеті кеңінен пайдаланылуда, — деген Айдар Садырбаев, Президенттің «Нұрлы жол – болашаққа бастар жол» атты Жолдауында көрсетілген жеті бағыт бойынша жүргізіліп жатқан жұмыстарға тоқталды.
Қала әкімі Айбек Кәрімов бөлім басшысына сала мамандарымен бірлесе жұмыс жасап, нақты атқарылып жатқан жұмыстарға баса назар аудару керектігін атап өтті. Ол сондай-ақ Елбасы Жолдауында айтылған негізгі бағыттар бойынша жүргізіліп жатқан жұмыстарға тоқталды.
— Бірінші, көлік-логистика инфрақұрылымын дамыту мәселесіне тоқталайық. Шынымен, біз «Солтүстік» көлік-логистикалық орталығы дегеніміз не?» дегенді кеңінен түсіндіруіміз керек. Бұл ретте аталмыш сала мамандарына, бөлім басшыларына нысанның аумағын анықтап, кеңейтудің жолын қарастыруды тапсырамын. Аумақта жақсы жұмыстар атқарылып жатыр. Ең бастысы, аталған ауданда Президент Н.Назарбаев зияткерлік мектебі, Семей мемлекеттік медицина университетінің жатақханалары, көптеген әлеуметтік маңызды нысандар болады. Енді «Оңтүстік» көлік-логистикалық орталығымен жұмыс жасаңыздар. Аукцион арқылы жер берілгенімен, бюджетке қаражат түспесе, ескерту жасап, жерді кейін қайтарып алыңыздар. Ол жерге құрылыс жүргізетін басқа адамдарды табамыз, бұл жерде мәселе жоқ, — деген Айбек Мүталапханұлы Елбасы Жолдауында көрсетілген негізгі бағыттарды нақты іспен жүзеге асыру керек екенін атап өтті.
Айбек Кәрімов энергетика инфрақұрылымды дамыту бойынша атқарылып жатқан жұмыстарға да баса назар аударып, Жолдаудағы энергетика инфрақұрылымын дамыту мақсатындағы «Екібастұз – Семей – Өскемен» және «Семей – Ақтоғай – Талдықорған – Алматы» бағыттарында жоғарғы кернеулі желілерді құру қажеттігін жеткізді.
— Осы жұмыстарды кеңінен насихат-тауымыз керек. Өткен жылы және биылғы жылы да ауқымды инвестициялар тартылды. Ауқымды құрылыс жұмыс-тары жүргізілуде. Сондықтан жұмыстарды көрсете білуіміз керек, — деді Айбек Мүталапханұлы.
Күн тәртібіндегі екінші мәселе – Семей қаласының 2011-2015 жылдарға арналған даму Бағдарламасының 2014 жылғы іске асырылу қорытындылары туралы қалалық экономика және бюджеттік жоспарлау бөлімінің басшысы Гүлжан Алтынбекова баяндама жасады.
Бөлім басшысының айтуынша, бағдарламаның бес бағыты бойынша 17 мақсат, 32 мақсатты индикатор мен 56 тікелей нәтиже көрсеткіші қарастырыл-ған. Өткен жылдың қорытындысы бойынша қалалық бюджеттен қаржыландырылатын атқарушы органдармен ұсы-нылған жедел есептілік негізінде Бағдарламаның жүзеге асу барысына мониторинг жүргізіліпті. Экономика және бюджеттік жоспарлау бөлімінің басшысы Гүлжан Алтынбекованың баяндамасы тыңдалып және талқыланғаннан кейін, қала әкімі Айбек Кәрімов:
— Семей қаласының 2011-2015 жылдарға арналған аумақтық даму бағдарламасының 2014 жылғы іске асырылу қорытындылары жаман емес. Тұрғындар алдындағы қала әкімінің есебінде де негізгі міндеттердің орындалғанын айтып өткен болатынмын. Бір айта кетерлігі, жылды жақсы аяқтағанымызбен, өткен жылы бюджет параметрлерінде олқылықтар болды. Биылғы жылы ол кемшіліктерді қайталамауымыз керек, — деген Айбек Мүталапханұлы бөлім басшысына мұқият болуды тапсырды.
Үшінші мәселе — инженерлік инфрақұрылымның дайындық барысы туралы қалалық тұрғын үй-коммуналдық шаруа-шылық, жолаушылар көлігі және автомобиль жолдары бөлімі басшысының міндетін атқарушы Мұрат Шәкерімов баяндады.
Баяндамасын «Бүгінгі күні Семей қаласы бойынша коммуналдық сектор инфрақұрылымының тозуы орташа есеппен 70 пайызды құрайды», — деп бастаған Мұрат Шәкерімовтің сөзіне қала әкімі Айбек Кәрімов:
— Бірден келісіп алайық. Барлық коммуналдық сектор инфрақұрылымының тозуы сіз келтірген 70 пайызды құрайтынына күмәнім бар. Бірден айтамын, қайта қарастырыңыздар. Кезінде осы сан айтылған. Қазір соны еш өзгеріссіз қайталап айтып жүрміз. Қаншама жаңа желілер салынып жатыр. Құрылыс жұ-мыстары жүргізілуде. Ондай көрсеткіш шықпайды деп ойлаймын. Сондықтан осындай мәлімдемелерді қысқарту керек, — деді.
Одан кейін қала басшысы шаһарды сумен қамтамасыз ету жұмыстары жөнінде сұрады. Бұл бағытта «Семей Водоканал» МКК екі жоба әзірлеген. Алғашқысы құны 10,026 млн. теңге болатын Достоевский көшесін сумен қамтамасыз ету желісін күрделі жөндеу болса, екінші жоба — Қосанов көшесінен Аюченко көшесіне дейінгі Ш.Уәлиханов көшесі бойындағы су құбырын қайта жаңғырту. Бұл жұмыстарға 74,3 млн. теңге жұмсалуы көзделуде.
Сонымен қатар жиын барысында қосымша мәселелер қаралды. «2014 жылдағы қала бюджетінің орындалу қорытындысы туралы» өз кезегінде қаржы бөлімі басшысының орынбасары Мария Осадчая баяндады. Қала әкімдігінің мәжілісінде қаралған мәселелер бойынша тиісті қаулылар қабылданды. Қала әкімі нақты тапсырмалар беріп, әкімдік мәжілісін қорытындылады.
Асан МЫРЗАХАНОВ,
«Семей таңы»
