Бұл туралы Орталық коммуникациялар қызметінің брифингінде Абай облысының әкімі Берік Уәли баяндады.
Абай облысында бұқаралық спортты дамыту және салауатты өмір салтын қалыптастыру бағытында жүйелі жұмыстар жүргізілуде.
Әртүрлі спорт түрлері бойынша биыл облыстың 451 спортшысы Қазақстан Республикасының құрама командасына енді. Өңір спортшылары республикалық жарыстарда – 1 355 медаль (оның 413-і — алтын, 373-і күміс, 569-ы қола медаль), халықаралық жарыстарда — 235 медаль иеленді (оның 72-сі алтын, 66-сы күміс, 97-і қола медаль). Олимпиадалық және ұлттық спорт түрлерінен атап өтсек, Азия чемпионаттарында 30 алтын, 18 күміс, 10 қола, Әлем чемпионаттарында 4 алтын, 3 күміс, 2 қола медаль жеңіп алды.
«Елімай» футбол командасы 2024-2025 маусымды 4 орынмен аяқтады және УЕФА Конференция лигасының іріктеу кезеңіне жолдама алды. «Семей» футзал командасы 2024 жылы ел Кубогының жеңімпазы атанды. 2025-2026 жылғы маусымда чемпиондар лигасында өнер көрсетеді. «Даму бала» ақпараттық жүйесі арқылы биыл 91 спорттық секциялармен 5 515 бала қамтылған.
Жыл басынан бері облыста үш жаңа спорт нысаны пайдалануға берілді. Сонымен қатар қазіргі уақытта бес нысанның құрылысы аяқталу сатысында. Бұдан бөлек облыс бойынша 11 спорт нысанының құрылысы жүргізіліп жатыр.
Жеке кәсіпкерлермен жасалған меморандумдар аясында да бірқатар нысандар бой көтеруде. Сондай-ақ «Туған жерге туынды тік» инвестициялық форумы аясында Семей қаласы әкімдігі мен «KAZ Minerals» ЖШС арасында меморандум жасалып, облыс орталығында 25 мың көрерменге арналған заманауи стадион салу жоспарланып отыр.
