Мемлекет басшысы өз сөзінде: «Өткен 23 жыл – біз үшін ғасырға бергісіз жылдар. Кезең-кезеңімен жүргізілген тұрақты саясаттың арқасында біз бүгінгі белеске көтерілдік. Қазақ қазақ болғалы қазіргідей төрт құбыласы түгел, қуатты елге айналып көрген емес. Біз бүгін қариясы қамсыз, азаматы алаңсыз, ұрпағы уайымсыз елдердің қатарына ұмтылдық. Біз үшін көк аспанымыз ашық, көк байрағымыз асқақ болғаннан артық мәртебе жоқ»,- деп атап өтті.
{jcomments on}Осы дәрежемізді, елдігіміз бен бірлігімізді, тұрақтылығымызды сақтап қалып, келер ұрпақтың алаңсыз ғұмыр кешуіне жағдай жасау – бүгінгі қоғамның міндеті.
«Бұрынғы Президент сайлауынан бері 4 жыл өтті. Бұл Қазақстан үшін жаңа мүмкіндіктер ашқан күрделі уақыт еді. Біз 2011 жылғы сайлауалды науқаны барысында менің тарапымнан айтылған барлық мақсаттарға қол жеткіздік. Біз әлемдегі аса дамыған 30 елдің қатарына ену жөніндегі ұзақмерзімді 2050 Стратегиясын жүзеге асырудамыз. Бүгінде мен жаһандық экономикалық және геосаяси тәуекелдерді есепке ала отырып, айқындап берген мемлекеттік бағдарламаларда дамудың барлық стратегиялық мәселелері белгіленген», — деген болатын Мемлекет басшысы халыққа үндеуінде.
Сондықтан да әлемдік экономикалық дағдарыс белең ала түскен кезеңде, халықтың жүрегіне ертеңгі күніне деген сенімділік ұялату, жұмыс орындарымен қамтамасыз ету, әлеуметтік төлемдердің, жалақының, стипендиялардың тұрақтылығын, қоғамымыздың бірлігін нығайту, ұлттық қауіпсіздікті қамтамасыз ету үшін кезектен тыс Президент сайлауын өткізу — уақыт талабынан туған қажеттілік. Бұл тұрғыда барша қазақстандықтар сайлауға жауапкершілікпен қатысады деген сенімдемін.
Бекен ТЕМІРОВ,
Семейдің облыстық тарихи-өлкетану музейінің директоры.
