«Шығыс» өңірлік қолбасшылығында үш жылға келісімшартпен еріктілерді резервке қабылдау жүріп жатыр. Резервке іріктеу жұмысы 2025 жылдың 18 наурызындағы «Әскери қызмет және әскери қызметшілердің мәртебесі туралы» ҚР Заңына енгізілген өзгерістерге сәйкес басталды. Резервтегі қызметке 18 бен 57 жас аралығындағы жұмыс істейтін де, жұмыссыз да азаматтар қабылданады.
Резервтегі қызметке ерікті келетін адам Қазақстан Республикасының азаматы болуы, қажетті моральдық және кәсіби қасиеттері болуы, денсаулық жағдайы жарамды болуы, әскери билеті болуы тиіс. Осыған дейін мәлімделгендей, үш жылға келісімшарт жасасқан азаматтар жылына бір рет 30 күнге жауынгерлік дайындық бойынша далалық жиындарға тартылатын болады. Одан өзге, оларға ай сайын 3 күн, яғни жылына 30 күндей жауынгерлік дайындық сабақтары өткізіледі. Осылайша, жылына 60 күн резервшілер әскери істерде өз дағдыларын шыңдауы керек. Жұмыс істейтін резервтегілерге орташа айлық жалақы төленеді, ал жұмыссыздар үшін ең төменгі жалақы қарастырылады.
Әскери резервтегілер жиыннан өту кезеңінде бюджет қаражаты есебінен медициналық қызметпен қамтамасыз етіледі. Әскери қызметтің жаңа түрі Қарулы күштерді жасақтау жүйесін одан әрі жетілдіруге бағытталған. Резерв қажет болған жағдайда жұмылдыру ресурсын қысқа мерзімде алуға мүмкіндік береді. Резервтегі қызметке қабылдау жергілікті әскери басқару органында жүзеге асырылатынын айта кетейік. Қазіргі уақытта Семей қаласының 32355, 30217 және Үшарал қаласының 40398 әскери бөлімдері резервтегілерді жасақтауда.
Абай өңірлік гарнизонының баспасөз қызметі
