2025 жылғы 6 қарашада Қытай Халық Республикасының жетекші жоғары оқу орындарының бірі – Сиань Цзяотун университетінде «Бір белдеу – бір жол» бастамасының озық ғылыми-технологиялық жетістіктерімен алмасу жөніндегі халықаралық конференциясы аясында Сиань Цзяотун университеті (ҚХР) тарапынан Шәкәрім университетіне (Қазақстан Республикасы) «Электрлік автоматтандыру жөніндегі Қазақстан-Қытай бірлескен зертханасына» арналған жабдықтардың алғашқы партиясының естелік сертификаты табыс етілді.
Сиань қаласында өткен «Бір белдеу – бір жол» бастамасына арналған халықаралық конференция аясында ұйымдастырылған бұл іс-шара серіктестіктің жаңа белеске көтерілгенін көрсетеді.
Ғылым мен технология: идеядан нақты жобаға
Қазақстан Президентінің стратегиясы мен ҚХР Төрағасының бастамасы аясында
Қазақстан мен Қытай арасындағы қазіргі заманғы ғылыми және білім беру серіктестігі екі мемлекет басшыларының үйлесімді стратегиялық бағытына — Қазақстан Республикасының Президенті Қасым-Жомарт Тоқаевтың интеллектуалды ұлт қалыптастыру және академиялық көшбасшылықтың жаңа орталықтарын дамыту жөніндегі стратегиялық курсы мен Қытай Халық Республикасының Төрағасы Си Цзиньпин ұсынған «Бір белдеу – бір жол» бастамасына негізделген.
Осы ұстанымдар Қазақстан мен Қытайдың бірлескен академиялық бастамаларының өзегіне айналып, бүгінде олар нақты нәтижеге бағытталған жобалар – ғылыми зертханалар, мәдени орталықтар және зерттеу альянстары түрінде жүзеге асырылуда.
Қазақстан Республикасының ресми делегациясын Ғылым және жоғары білім вице-министрі Гүлзат Көбенова мен Shakarim University ректоры Думан Орынбеков бастап барды.
Бұл 2025 жылғы 16 маусымда Астанада өткен «Орталық Азия – Қытай» индустриялық-инвестициялық ынтымақтастық форумында екі ел арасында жасалған келісімнің нақты жүзеге асуы.
Жаңадан құрылатын зертхана екі ел арасындағы технология алмасу мен өндірістік серіктестікті дамытуда маңызды рөл атқарып, ғылыми жаңалықтарға негізделген ортақ экономикалық тізбектің дамуын жылдамдатады. Жобаның негізгі мақсаты – өңірдегі инновацияларды дамыту, өндірісті жаңарту және ғылым мен өндіріс арасындағы байланысты нығайту.
Сондай-ақ, зертхана логистика саласындағы жаңа технологияларды зерттеу мен дамытуға бағытталады. Мұнда автоматтандыру, ақылды логистика жүйелері мен логистикалық саланы жетілдіруге арналған арнайы платформа құрылады. Ол толықтай Абай облысының өңірлік инновациялық платформасына интеграцияланып, қазақстандық инженерлік ғылымның жаңа тынысын ашады деп күтіліп отыр.
ҚР Ғылым және жоғары білім вице-министрі Гүлзат Көбенова атап өткендей:
«Бұл зертхана – идеядан нақты іске айналған серіктестіктің айқын нәтижесі. Ғылым мен технология саласындағы осындай ынтымақтастық – Президент Қасым-Жомарт Тоқаевтың инновациялық даму және интеллектуалды ұлт қалыптастыру стратегиясымен үндес».
Ғылым – болашаққа ашылған есік
Сиань Цзяотун университетімен әріптестік негізінде іске қосылған Электрлік автоматтандыру жөніндегі бірлескен зертхана – Қазақстан мен Қытай арасындағы ғылыми-инновациялық ынтымақтастықтың жаңа белесі. Бұл бастама екі елдің инженерлік әлеуетін біріктіріп, білім мен өндірістің өзара байланысын нығайтады.
Бұл бастама Қазақстан Президенті Қасым-Жомарт Тоқаевтың инновациялық даму мен ашық білім беру саясатын нақты жүзеге асыруға қызмет ететін, елдегі ғылыми зерттеулерді, жоғары технологиялық жобаларды және білім беру инфрақұрылымын жаңғыртудың маңызды қадамы деуге болады. Сонымен қатар, бұл Қазақстан мен халықаралық серіктес елдер арасындағы ғылыми-инновациялық диалогты нығайтып, жас ғалымдар мен инженерлерге тәжірибе алмасу, жаңа технологияларды игеру және өндірістік шешімдерді халықаралық стандарттар деңгейінде жүзеге асыру мүмкіндігін ашады. Осындай бастамалардың өңірлік университеттердің ғылыми әлеуетін арттырып, инновациялық экожүйенің дамуына және Қазақстанның интеллектуалды көшбасшылық позициясын нығайтуға септігін тигізері сөзсіз.
Шәкәрім университетінің баспасөз қызметі
