Әйгілі «Ауылым» әнінің сөзін жазған белгілі ақын — ҚР мәдениет саласының үздігі, «Құрмет» орденінің иегері, Үржар ауданының Құрметті азаматы Жабайыл Бейсеновтің есімі қазақ әдебиеті мен мәдениетінде ерекше орын алады. Алакөл жағасында ғұмыр кешіп-ақ ауылын жырлаған ақынды Қабдеш Жұмаділов, Тұрсын Жұртбай, Несіпбек Айтұлы секілді зиялы қауым қадір тұтты.
Үржар ауданында «Жусанды дала жыршысы» тақырыбында мектеп оқушылары арасында «Жабайыл оқулары» өтті. Жабайыл Бейсеновтің шығармашылығын дәріптеу мақсатында ұйымдастырылған сайысқа ауданның 14 мектебінен 33 оқушы қатысып, ақын өлеңдерін мәнерлеп оқыды.
Оқушылардың өнерін қазылар алқасы — мәдениет және тілдерді дамыту бөлімінің басшысы Ж.Андасова, «Амаnат» партиясы аудандық филиалының төрағасы Е.Бейсенов, аудандық мәдениет үйінің директоры Қ.Сатмұхамбетов пен көркемдік жетекшісі П.Төлегенова, сондай-ақ аудандық орталық кітапхананың директоры Р.Базарбаева, білім бөлімінің әдіскері Р.Жүнісова, «Уақыт тынысы» газетінің тілшісі ақын А.Оспанов бағалады.
Байқау қорытындысы бойынша, бас жүлдені Мұхтар Мақсатұлы (І.Жансүгіров орта мектебі) жеңіп алды. І орынды Қазымбет ауылынан бақ сынаған Мирас Қайратов еншіледі. ІІ орынды Инабат Тоқтасынова мен Құттыбек Бейсенғазы өзара бөліссе, ІІІ орынды Еркежан Бақтыбек (Науалы ауылы) пен Ер Қабанбай мектебінен қатысқан Нұрай Слямғазы иеленді.
Үржар өңірінен шыққан ақын-жазушылардың шығармаларын дәріптеу, қазақ тілінің мәртебесін көтеру, жас ұрпақты өнерге баулу байқаудың басты мақсаты болды.
Саналы ғұмырында ақындық пен ұстаздықты қатар алып жүрген Жабайыл Бейсеновтің өлеңдері балалар мен жастарға жаттауға жеңіл, көңілге қонымды әрі терең мазмұнды болып келеді. Былтырдан бері өтіп келе жатқан «Жабайыл оқуларына» өлеңқұмар оқушылар биыл да үлкен қызығушылықпен қатысты.
«ST» — ақпарат
