Semeytany.kz — Орал қаласында өткен Қазақстан–Ресей өңіраралық форумына Абай облысының әкімі Берік Уәли бастаған өңір делегациясы қатысып, бірқатар маңызды келіссөздер жүргізді.
«Жұмысшы мамандықтары – экономикалық өсімнің қозғаушы күші» тақырыбында өткен форум жұмысына Мемлекет басшысы Қасым-Жомарт Тоқаев пен Ресей Федерациясының Президенті Владимир Путин бейнебайланыс арқылы қосылып, екі ел үшін де өзекті мәселелер жөнінде баяндама жасады.
Пленарлық сессияға Абай облысының әкімімен бірге кәсіпкерлік және индустриялық-инновациялық даму, цифрландыру және жастар саясаты басқармаларының, сондай-ақ «Семей» әлеуметтік-кәсіпкерлік корпорациясының басшылары кіретін делегация да қатысты.
Форум аясында Берік Уәли Ресей Федерациясының Омбы облысының губернаторы Виталий Хоценкомен және Алтай өлкесі губернаторының орынбасары Юрий Абдуллаевпен кездесті. Тараптар өңіраралық қатынастардың қазіргі жағдайын талқылап, алдағы уақытта экономикалық әріптестікті күшейтуге, сауда-экономикалық байланыстарды кеңейтуге, ауыл шаруашылығы мен өңдеу өнеркәсібіндегі ынтымақтастықты дамытуға, сондай-ақ логистика мен транзиттік мүмкіндіктерді жетілдіруге ерекше көңіл бөлді.
Кездесуде білім, мәдениет және денсаулық сақтау салаларындағы бірлескен жобалар, туристік бағыттарды дамытудың тиімді жолдары, шағын және орта бизнес үшін жаңа мүмкіндіктер қарастырылды. Инвесторларды тарту, инфрақұрылымдық жобаларды жеделдету және шекаралық ынтымақтастықты нығайту бойынша нақты бастамаларды бірлесе пысықтау туралы келісімге келді. Өзара көрші аймақтар ретінде тұрақты диалог пен тығыз байланыстарды сақтаудың маңызы атап өтілді.
Форум барысында Абай облысының «Кондиз» ЖШС мен Ресей Федерациясының Қазан қаласындағы «Болашақ» компаниясы арасында өнім жеткізу туралы меморандумға қол қойылды. Бұл келісім өңірде өндірілетін кондитерлік өнімдердің жаңа нарыққа шығуына мүмкіндік беріп, Қазақстан мен Ресей арасындағы сауда-экономикалық ынтымақтастықты одан әрі нығайтуға ықпал етпек.
Жиында, сондай-ақ, жұмысшы мамандықтарының рөлін арттыру, өндіріс пен технологияны дамыту, көлік және логистика салаларындағы серіктестік мәселелері талқыланды. Қос елдің іскер топтары B2B форматында кездесулер өткізіп, өзара тиімді әріптестікті жолға қою жолдарын қарастырды.
