Semeytany.kz — Ақсуат ауданында Ақсуат, Құмкөл және Ойшілік ауылдарын байланыстыратын жол бойындағы Тебіске өзенінен өтетін көпірді қайта салу жұмыстары басталды. Жоба аудан тұрғындарының ұзақ жылдан бергі өтініші негізінде қолға алынып, көлік қатынасының қауіпсіздігін арттыруға және өңірдің әлеуметтік-экономикалық дамуына серпін бермек.
Аудан әкімдігінің мәліметінше, жаңа көпірдің ұзындығы 55 метр, ені 8 метр болады. Екі жолақтан тұратын нысан арқылы қозғалыс екі бағытта да ыңғайлы ұйымдастырылады. Сонымен қатар, көпірге кіреберіс жолдың ұзындығы 832 метрді құрайды.
Қазіргі уақытта құрылыс жұмыстары бекітілген кестеге сәйкес жүріп жатыр. Нысанға қажетті материалдар толық жеткізілген, төрт тіректің іргетасы қаланған. Барлық жұмыстар қауіпсіздік техникасы мен сапа стандарттарына сай орындалуда.
Көпір құрылысы аяқталғаннан кейін үш ауылдың тұрғындары үшін қатынау анағұрлым жеңілдеп, автокөлік қозғалысы бұрынғыға қарағанда әлдеқайда қауіпсіз әрі ыңғайлы болмақ. Бұл жоба – аудан халқының көп жылдан бері айтылып келе жатқан өзекті мәселесін шешуге бағытталған маңызды қадам әрі аймақтың көлік инфрақұрылымын жаңғыртуға арналған зор мүмкіндік.
