Semeytany.kz – Астанада Мемлекет басшысы Қасым-Жомарт Кемелұлы Тоқаевтың қатысуымен Ауыл шаруашылығы еңбеккерлерінің екінші форумы өтіп, оған Абай облысының делегациясы да арнайы барып қатысты.
Облыс атынан шараға аймақ әкімі Берік Уәли бастаған делегация келді. Құрамында облыс әкімінің орынбасары Думан Рысбеков, ауыл шаруашылығы және ветеринария басқармаларының басшылары, фермерлер қауымдастығының өкілдері, сондай-ақ өңірдің 50-ге жуық ауыл шаруашылығы тауарын өндірушілері болды.
Форум барысында Президент аграрлық саланың дамуына айрықша үлес қосқан бірқатар азаматтарға мемлекеттік наградалар табыстады. Солардың қатарында жерлесіміз, Семей қаласындағы «халал» стандарты бойынша шұжық және ет деликатестерін шығаратын «Арай East food» ЖШС-інің бас технологы Людмила Балашова бар. Ол III дәрежелі «Еңбек Даңқы» орденімен марапатталды. Людмила Балашова аталған кәсіпорында 2014 жылдан бері еңбек етіп келеді.
Жиында еліміздің аграрлық секторын одан әрі дамыту, жаңа технологияларды өндіріске енгізу, фермерлерді қолдау тетіктерін жетілдіру, сондай-ақ азық-түлік қауіпсіздігін нығайту мәселелері кеңінен талқыланды.
