Semeytany.kz — Абай облыстық «SEMEI» телеарнасына биыл 60 жыл толды. Алты онжылдық ішінде аймақтық арна өңір жұрты мен билік арасында дәнекер болып, ұлттық рухты, елдік сананы оятуға елеулі үлес қосты.
1965 жылдың 1 қыркүйегінде Семей телестудиясының алғашқы ресми хабары эфирге шықты. Ол кезде жаңа студия Алматы, Қарағанды, Өскемен, Ақтөбе телестудияларынан кейінгі республикадағы бесінші, ал бүкіл Одақ бойынша 116-телестудия ретінде тіркелген еді.
Бүгінде «SEMEI» телеарнасы тәулігіне 14 сағат бойы эфирге шығып, көрерменге 30-ға жуық авторлық бағдарламаны ұсынады. Жаңалықтар қызметі күніне бес рет хабар таратады. Ақпараттық кеңістіктегі бәсекеге сай болу үшін арнада «Digital SEMEI» шығармашылық бөлімі құрылып, жаңа медиа бағытындағы жобалар жүйелі түрде іске асырылуда.
Телеарна алғаш рет Қытай Халық Республикасынан тікелей қосылым ұйымдастырып, халықаралық деңгейде хабар таратты. Ұлы Абайдың 180 жылдық мерейтойы кезінде арна тікелей эфирлер мен әлеуметтік желілер арқылы жедел ақпарат жеткізді. Биылғы жылы да бірқатар деректі фильмдер түсіріліп, «Таза Қазақстан» бағдарламасы аясында тәрбиелік мәні зор бейнероликтер көрерменге жол тартты. Мерейтой қарсаңында Семей қаласындағы бір көшеге қазақтың «Левитаны» атанған әйгілі радио жүргізуші, диктор, Қазақстанның халық әртісі Әнуарбек Байжанбаевтың есімі берілуі де ерекше оқиға болды.
Өңірдің айнасына айналған телеарнаның 60 жылдығына арналған салтанатты жиын Абай атындағы облыстық кітапханада өтті. Шараға облыс әкімі Берік Уәли қатысып, телеарна ұжымын мерейлі мерекемен құттықтады.
«Алпыс жыл – тек бір ұжымның ғана емес, тұтас өңірдің тарихына айналған үлкен белес. Уақыт сынынан өткен, ұлттың үнін жеткізген рухани арнаның мерекесі. Мемлекет басшысы Қасым-Жомарт Кемелұлы Тоқаев: «Түптеп келгенде, мемлекет те, журналист те ұлт үшін қызмет етеді, ел тағдырын шешуге атсалысады. Өйткені, ұлт баспасөзі мен ұлт мүддесі қай кезде де өзектес болған. Қазір де солай» деген. Бұл сөздер Семей телеарнасының жолы мен рухына дәл келеді. Алғашқы хабарлардан бастап бүгінге дейін арна халықтың үмітін, елдің тынысын жеткізіп, жаңа дәуірдің бастауын паш етті. Семей телеарнасы – уақыттың куәсі, елдің айнасы, рухтың мінбері. Бүгінгі мерейтой – өткенге тағзым, болашаққа сенім. Алпыс жылдық абыройлы тарих ел мен елді, ұрпақ пен ұлтты жалғаған алтын көпірге айналды. Семей телеарнасы – Семейдің үні, Абай елінің рухы», – деп атап өтті аймақ басшысы.
Салтанатты кеште телеарнаның ардагерлері мен қазіргі қызметкерлері мерейтойлық марапаттарға ие болды. Ардагерлер Фатима Бегенбаева, Зинаида Омарова, Мұратқазы Алин және Тілеген Ахметов Мәдениет және ақпарат министрлігінің «Еңбек ардагері» медалімен наградталды. Ұжымның шеф-редакторы Гүлнәз Кәукен, оператор Елжан Мағзұмов және редактор Бақытгүл Қазез «Ақпарат саласының үздігі» төсбелгісіне ие болды.
Сонымен қатар телеарнаның бірқатар қызметкерлеріне Мәдениет және ақпарат министрлігінің Алғыс хаттары мен Құрмет грамоталары, облыс әкімінің Алғыс хаттары табысталды. Аймақ басшысы облыс жұртшылығы атынан телеарна ұжымына автокөліктің кілтін тапсырып, шығармашылық табыс пен жаңа белестер тіледі.
