Semeytany.kz — Абай облысының әкімі Берік Уәлидің төрағалығымен өткен кеңейтілген аппараттық кеңесте өңірдегі автомобиль жолдарын қысқы кезеңде күтіп-ұстау және 2025–2026 жылғы жылыту маусымында қауіпсіздікті қамтамасыз ету мәселелері қаралды. Отырысқа облыстық басқарма басшылары мен өңірлік департамент жетекшілері қатысып, аудан және қала әкімдері онлайн режимде қосылды.
Күн тәртібіндегі негізгі баяндамаларды облыстық жолаушылар көлігі және автомобиль жолдары басқармасының басшысы Мерей Байырхан, «ҚазАвтоЖол» ҰК» АҚ облыстық филиалының басшысы Айбек Әнуарбеков және Төтенше жағдайлар департаменті бастығының орынбасары Алексей Штыкель жасады. Аудан-қала әкімдері де өз аумақтарындағы жолдардың қысқа дайындығы туралы есеп берді.
Облыс аумағындағы республикалық маңызы бар жолдардың қызмет көрсетілетін жалпы ұзындығы 2176 шақырымды құрайды. Қысқы мерзімде бұл жолдарды күтіп-ұстауға 143 арнайы техника жұмылдырылмақ. Желтоқсан айында «Талдықорған – Қалбатау – Өскемен» автожолының 309 шақырымы пайдалануға беріліп, қызмет көрсетілетін учаске көлемі 2002 шақырымға дейін артады.
Қар толассыз жауып, боран жиі соғатын учаскелер де алдын ала анықталған. Облыс бойынша қар басу қаупі жоғары 51,3 шақырым бөлік белгіленіп, бұл бағыттарда тәулік бойы патрульдік кезекшілік ұйымдастырылатын болады. Қысқа дайындық аясында 3100 метр қар тоқтату қалқандары орнатылып, 303 уақытша жол белгісі қойылған.
Облыстық маңызы бар автомобиль жолдарының ұзындығы 1593 шақырым, олар 22 учаскеден тұрады. Бұл бағыттар бойынша да қысқы маусымға қажетті құм-тұз қоспалары мен басқа да материалдар қамдалып, 98 техника дайындалған. Төтенше жағдайлар туындаған кезде жедел әрекет ету үшін жоғары өтімділігі бар арнайы машиналар, 7 жылыту пункті және қосымша 91 жылыту орны қарастырылған.
Республикалық жолдарды күтіп-ұстау сапасын арттыру мақсатында көктайғаққа қарсы материалдарды сақтауға арналған 7 жаңа ангар-база салынды. Олар Семей және Аягөз қалаларында, сондай-ақ Аршалы, Қалбатау, Үржар, Қызылкесік және Бесқарағай елді мекендерінде орналасқан.
Жиын қорытындысында аймақ басшысы жауапты орынбасары Серік Төленбергеновке, сондай-ақ аудан және қала әкімдеріне облыстық және республикалық маңызы бар жолдарды қысқы күтіп-ұстау үшін техниканың жеткіліктілігін жан-жақты талдауды тапсырды. Қар басу қаупі жоғары учаскелерге қосымша техника бекітіп, тәулік бойы патрульдік қызметті күшейту қажеттігін баса айтты.
Сонымен қатар, жылыту және тамақтандыру пункттерінің дайындығына ерекше назар аудару керектігі айтылды. Тиісті басқармаларға қыс мезгілінде жедел жәрдем, өрт сөндіру және басқа да қызметтердің жұмысын қиындатуы мүмкін факторлардың алдын алып, оларды дер кезінде жоюды қатаң бақылауда ұстау тапсырылды.
Берік Уәли ұсынылған баяндамалар өңірде қысқы дайындықтың жүйелі жүргізіліп жатқанын көрсететінін атап өтті. Дегенмен техникамен қамтамасыз ету, қауіпті учаскелердегі қауіпсіздікті күшейту, жылыту және тамақтандыру пункттерін қаржыландыру мәселелеріне тұрақты мониторинг қажет екенін айтып, барлық құрылымдардың үйлесімді жұмысы ғана қыс мезгіліндегі қауіпсіздіктің кепілі болатынын жеткізді.
