Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте 2025-2026 жылғы жылыту маусымында өрт қауіпсіздігін қамтамасыз ету мәселелері қаралды. Жиында баяндама жасаған Төтенше жағдайлар департаменті бастығының орынбасары Алексей Штыкель қысқы кезеңдегі ахуал мен қабылданып жатқан шаралар туралы мәлімет берді.
Облыс аумағында 122 997 тұрғын үй бар. Оның ішінде 101 мыңнан астамы – жеке тұрғын үйлер, 7 452-сі – көп пәтерлі үйлер, 14 390-ы – саяжайлық нысандар. 2024–2025 жылдардағы жылыту кезеңінде өңірде 304 өрт оқиғасы тіркеліп, бұл көрсеткіш өткен жылмен салыстырғанда 44 пайызға жоғарылаған. Өрттің негізгі себептері ретінде пештерді орнату және пайдалану ережелерін бұзу, электр жабдықтарын дұрыс қолданбау, сондай-ақ ашық отты абайсыз пайдалану аталды.
Департаменттің мәліметінше, облыс бойынша өрт қаупі жоғары саналатын барақ үлгісіндегі 303 үй және тозығы жеткен, авариялық санаттағы 72 үй бар. Қауіптің алдын алу мақсатында 2025–2026 жылдарға арналған арнайы жоспар іске асырылып жатыр. Оның аясында 1 733 үй тексеріліп, 2 779 құқықбұзушылық анықталған. Соның нәтижесінде 155 тұрғын үйде мұржаларды тазарту, пештерді әктеу, электр сымдарын оқшаулау сияқты қауіпсіздік жұмыстары жүргізілді.
2022 жылдан бері облыста 15 205 көміртегі тотығы датчигі орнатылған. Мамандардың айтуынша, осы құрылғылардың уақтылы іске қосылуы 21 адамның өмірін аман алып қалуға мүмкіндік берген.
Кеңес қорытындысында аймақ басшысы аудан және қала әкімдеріне, тиісті басқармаларға өрт қаупі жоғары тұрғын үйлер мен нысандардың нақты тізімін жасап, оларды тұрақты бақылауда ұстауды тапсырды. Сонымен қатар әлеуметтік осал топтардың үйлеріндегі жылыту және электр жүйелерінің жағдайын жүйелі түрде қадағалау, жеке сектор тұрғындары арасында қыс мезгілінде балаларды қараусыз қалдырмау жөнінде кең ауқымда ақпараттық-түсіндірме жұмыстарын күшейту міндеттелді.
