Semeytany.kz — Абай облысында қуаты 1 ГВт болатын ірі жел электр станциясын салу көзделіп отыр. Бүгін облыс әкімі Берік Уәли мен Қытайдың «Zhongwei Xinneng» технологиялық компаниясының бас директоры Ян Соцзюнь осы жобаны жүзеге асыру жөніндегі меморандумға қол қойды.
Жоспар бойынша жобаға шамамен 880 миллион АҚШ доллары көлемінде инвестиция тартылмақ. Жел электр станциясы іске қосылғаннан кейін өңірдің энергетикалық инфрақұрылымы жаңарып, жаңа жұмыс орындары ашылады. Әкімдік тарапынан жер учаскелерін бөлу, рұқсат беру рәсімдерін жеделдету, сондай-ақ жобаны сүйемелдейтін әкімшілік қолдау көрсету қарастырылған. Жұмысты тиімді үйлестіру мақсатында екіжақты жұмыс тобы құрылатын болады.
Берік Уәли баламалы энергия көздерін дамыту Абай облысы үшін стратегиялық маңызға ие екенін атап өтті. Оның айтуынша, Қазақстан мен Қытай басшылары Қасым-Жомарт Тоқаев пен Си Цзиньпин арасындағы сенімді әріптестік қарым-қатынас инвесторлар үшін қосымша мүмкіндік ашып отыр. Әкім инвестиция тарту – ұлттық экономиканы әртараптандырудың және жаңа өндірістер мен технологияларды енгізудің негізгі тетіктерінің бірі екенін ерекше айтты.
Облыс әкімі өз сөзінде шетелдік инвесторларға жер мәселесін шешуден бастап, инфрақұрылымға қол жеткізуге және мемлекеттік органдармен өзара іс-қимыл жасауда жан-жақты қолдау көрсетілетінін атап өтті. Оның пікірінше, бүгінгі меморандум екі жақты ынтымақтастықтың жаңа кезеңін бастап, өңірдің экономикалық әлеуетін толық пайдалануға жол ашады.
Қытайлық компания өкілдері де жобаға мейлінше мүдделі екенін жеткізді. «Мен Абай облысына екінші рет келіп отырмын. Екі жаққа да тиімді жоба басталды деп есептеймін. Біз сіздердің өңірлеріңізге 800 миллион АҚШ доллары көлемінде инвестиция салуға дайынбыз. Қазақстан экономикасының, оның ішінде энергетика саласының дамуына өз үлесімізді қосқымыз келеді. Бұл жоба жүзеге асқанда 300-ден 500-ге дейін адамды тұрақты жұмыспен қамтуға мүмкіндік туады», – деді «Zhongwei Xinneng» компаниясының бас директоры Ян Соцзюнь.
Абай облысында соңғы жылдары инвестиция тарту және өнеркәсіптік әлеуетті күшейту бағытында жүйелі жұмыстар жүргізілуде. Жыл басынан бері аймақ басшысы 100-ден астам шетелдік инвестормен кездескен. «Үлкен Алтай» халықаралық субөңірлік конференциясы аясында Қытайдың жетекші компанияларымен жалпы құны 1,5 миллиард АҚШ долларын құрайтын 15 меморандумға қол қойылды. Бұл келісімдер логистика, туризм, өңдеу өнеркәсібі және басқа да маңызды салаларды қамтиды.
Қазіргі таңда қытайлық серіктестердің қатысуымен жалпы құны 39,5 млрд теңге болатын 3 жоба іске асырыла бастады. 2025 жылдың басынан бері өңірде жүзеге асырылып жатқан инвестициялық жобалардың саны 29-дан 97-ге дейін көбейген. Тартылған инвестиция көлемі 2,2 трлн теңгеден 3,5 трлн теңгеге дейін өсіп отыр. Соның ішінде 50 жоба Ұлттық цифрлық инвестициялық платформаға енгізілген.
