Semeytany.kz — Семей қаласында өтетін облыстық әйелдер форумы қарсаңында Абай облысының әкімі Берік Уәли қоғамда белсенді, түрлі салада табысты еңбек етіп жүрген іскер әйелдермен кездесті.
Жиынға Қазақстанның еңбек сіңірген қайраткері Светлана Айтбаева, Астана қаласы әкімі жанындағы Әйелдер істері және отбасылық-демографиялық саясат жөніндегі комиссия төрағасының орынбасары Назгүл Мақжанова, Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия мүшесі, «Мейірім құшағы» республикалық комиссиясының төрайымы Әйгерім Сәрсенбаева, сондай-ақ Абай облысы әкімінің гендерлік теңдік мәселелері жөніндегі штаттан тыс кеңесшісі, «Асыл Мирас» орталығының директоры Арайлым Әлімжанова қатысты.
Кездесу барысында өңірдегі гендерлік саясаттың өзекті бағыттары, әйелдердің қоғамдық-саяси, әлеуметтік және экономикалық өмірдегі рөлін күшейту, отбасылық-демографиялық ахуалға қатысты мәселелер жан-жақты сөз болды. Форумға келген делегаттар әйелдердің қоғам өміріне белсенді араласуын қолдау, ана мен бала құқығын қорғау, гендерлік теңдікті ілгерілетуге арналған бастамалары туралы ұсыныс-пікірлерін ортаға салды.
Аймақ басшысы Берік Уәли қатысушылар көтерген идеялар мен бастамалардың маңызын атап өтіп, әйелдер мен балаларды әлеуметтік қолдау тетіктерін күшейту, отбасылық құндылықтарды нығайту және тең мүмкіндіктер саясатын жетілдіру бағытындағы ұсыныстар жұмыс барысында ескерілетінін жеткізді.
Абай облысында әйелдердің экономикалық белсенділігін арттыруға ерекше көңіл бөлінуде. Биыл гранттық қаржыландыруға қарастырылған 110 миллион теңгенің 95 миллион теңгесі 21 әйел кәсіпкерге берілді. Сонымен қатар «Даму» қоры арқылы 42 әйел 1,6 миллиард теңге көлемінде субсидияланған несиеге қол жеткізді. Әйелдер мемлекеттік қызметшілердің 58,4 пайызын құрайды, олардың 370-і басшылық лауазымдарда еңбек етеді. Шағын және орта бизнес саласында да әйел кәсіпкерлер үлесі жыл сайын өсіп келеді.
