Таяуда Семей қаласында «Тарих маусымы» тақырыбына өткен «Жайдарман» сайысына алғаш рет Қайнар ауылының мектеп оқушылары қатысып қайтты. Мәдениет үйіндегі «Жас қанат» драма үйірмесінде шыңдалып, өнердің қыр-сырына бейімделген шәкірттер «EXPO түлектері» командасы болып, «Жайдарман» сайысына мәдениет үйінің қызметкері Ұлан Ысқақовтың жетекшілік етуімен барған болатын. Айта кету керек, команда құрамында Е.Саматов, Т.Берікқанов, Е.Уақасов, Ш.Уақасов, Ә.Нұрмағанбетов, А.Бағдатовтар өнер көрсетті. Команданы сайысқа дайындап, оның жоғары деңгейде өнер көрсетуі үшін Ұ.Ысқақовтың үлесі зор. Ол өзінің бойындағы талантын жас жеткіншектерге үйретуде әркез ізденіс үстінде жүреді.
{jcomments on}Екі күн бойы өткен тартысты сайыста әділ қазылар алқасы «EXPO түлектері» командасының өнерін жоғары бағалап, ризашылық білдіріп, үздік үш команданың қатарына іліктірді. Олар алдағы уақытта өтетін сайысқа жолдама алды. Команда жетекшісі алғыс хатпен марапатталды. Ауылдың намысын қорғап жүрген жас жеткіншектерге өнердің биігінен көріне беріңдер дегіміз келеді.
Ләззат ТАЙЛАҚАНҚЫЗЫ,
Қайнар ауылы.
