Semeytany.kz — Мақаншы ауданының Барлық-Арасан ауылында жергілікті тұрғындарға алғашқы медициналық көмек көрсететін жаңа медициналық-фельдшерлік пункт пайдалануға берілді.
Ауылда 100-ден астам адам тұрады. Жаңа нысанның ашылуы ауыл халқына алғашқы медициналық-санитарлық көмекті сапалы әрі қолжетімді түрде алуға мүмкіндік бермек.
Медициналық пункт «Ауылдық денсаулық сақтауды жаңғырту» ұлттық бағдарламасы аясында салынды. Осы бағдарлама бойынша аудан көлемінде барлығы 8 амбулаториялық және медициналық-фельдшерлік пункт бой көтерді.
Жаңа фельдшерлік пунктте тұрғындарды қабылдау, бастапқы тексеруден өткізу, жеңіл медициналық қызмет түрлерін көрсетуге арналған қажетті кабинеттер қарастырылған. Бұл ауылдағы медициналық қызметтің қолжетімділігі мен сапасын арттыруға бағытталған маңызды қадам болып отыр.
Ғимарат заманауи медициналық техникамен жабдықталған. Мұнда нейбулайзер, электрокардиограф, дефибриллятор, магнитотерапия аппараты, спирометр және жоғарғы тыныс алу жолдарын емдеуге арналған ультракүлгін құрылғылар орнатылған.
Нысанның ашылу рәсіміне Мақаншы ауданының әкімі Дәурен Қойгелдин қатысып, ауыл тұрғындарын жаңа медициналық пункттің іске қосылуымен құттықтады. Ол бұл нысанның халық денсаулығын нығайтуға, әсіресе ауылдық елді мекендерде медициналық көмектің қолжетімділігін қамтамасыз етуге зор үлес қосатынын атап өтті.
