Semeytany.kz — Абай облысында ауыл шаруашылығы мақсатындағы пайдаланылмай жатқан жерлерді мемлекет меншігіне қайтару жұмыстары биыл ерекше қарқынмен жүргізіліп, жылдық жоспар толық әрі мерзімінен бұрын орындалды.
2025 жылға бекітілген жоспар бойынша облыста 170 мың гектар жерді мемлекетке қайтару көзделген болатын. Жыл басынан бері облыс әкімдігінің ведомстволық жұмыс тобы 171,2 мың гектар алқапты қайта айналымға енгізіп, жоспарды 101 пайызға орындады.
Қайтарылған жерлердің 151,5 мың гектары – жайылым, 10,7 мың гектары – егістік, ал 9,1 мың гектары – өзге санаттағы алқаптар. Бұл көрсеткіштер өңірде пайдаланылмай бос жатқан жерлерді анықтау, заңнама талаптарына сәйкес тексеру және оларды мемлекет иелігіне алу бағытында жүргізілген жүйелі жұмыстың нәтижесін айқын көрсетеді.
Атқарылып жатқан шаралардың басты мақсаты – ауыл шаруашылығы айналымынан шығып қалған жерлерді қайтадан экономикалық айналымға енгізу, олардың тиімділігін арттыру және жер ресурстарын басқаруда ашықтық пен тәртіпті қамтамасыз ету.
Облыстық Жер ресурстарын басқару департаменті мен облыс әкімдігінің үйлесімді жұмысы нәтижесінде қайтарылған жерлер алдағы уақытта ауыл шаруашылығы мақсатындағы жаңа жобаларды жүзеге асыруға, мал жайылымы мен егіндік алқаптарды кеңейтуге, жалпы өңірдің аграрлық әлеуетін күшейтуге бағытталмақ.
