Semeytany.kz – Қазақстанның даңқты боксшысы Геннадий (Gennadiy) Головкин Римде өткен World Boxing конгресінде ұйымның президенті болып сайланып, халықаралық спорт федерациясын басқаратын тұңғыш қазақстандық атанды.
World Boxing конгресінде GGG соңғы бюллетеньде жалғыз үміткер болды. Конгреске қатысқан мүшелер қазақстандық боксшыны бірауыздан қолдап, аккламация жолымен үш жылдық мерзімге президент қызметіне бекітті. Осылайша ол LA–2028 Олимпиадасына дейін ұйымды басқару міндетін өз мойнына алды.
Геннадий Головкин – 2004 жылғы Афины Олимпиадасының күміс жүлдегері, екі дүркін орта салмақтағы әлем чемпионы, кәсіби рингте 42 жеңіс, 2 жеңіліс және 1 тең нәтижемен танылған боксшы. 2024 жылдан бері Қазақстан Ұлттық Олимпиада комитетінің президенті қызметін де атқарып келеді.
Сайлаудан кейін Мемлекет басшысы Қасым-Жомарт Тоқаев Геннадий Головкинді World Boxing халықаралық федерациясының президенті болып сайлануымен құттықтап, бұл жетістігін қазақстандық спорттың ғана емес, бүкіл ел абыройының өсуі деп бағалады. Президент құттықтауында GGG-дің олимпиадалық спорт түрі бойынша халықаралық федерацияны басқаратын Қазақстанның алғашқы өкілі атанғанын ерекше атап өтті.
