Semeytany.kz — Ақсуат ауданының Екпін және Ойшілік ауылдарында заманауи спорт модульдерінің құрылысы жүріп жатыр. Ауыл жастары үшін қолжетімді спорт инфрақұрылымын көбейту бағытындағы бұл жобалар бүгінде қарқынды жүзеге асырылуда.
Екпін ауылындағы спорт модулінің құрылысы шамамен 90 пайызға орындалған. Ғимараттың қабырғалары тұрғызылып, шатыры жабылған. Қазіргі уақытта ішкі әрлеу, жылу жүйесін монтаждау және жарықтандыру жұмыстарын аяқтау көзделіп отыр.
Ойшілік ауылындағы спорт модулінің құрылысы шілде айында басталған. Бүгінде нысанның қабырғалары көтеріліп, шатыры жабылған. Ішкі әрлеу, жылу жүйесін тарту, өрт қауіпсіздігі құралдарын орнату жұмыстары жүргізілуде. Сондай-ақ сыртқы жүгіру жолы, футбол және баскетбол алаңдарын салу қолға алынған.
Қазіргі таңда Ақсуат ауданында 51 спорт нысаны жұмыс істейді. 2024 жылы ауданның 9 ауылында шағын футбол және футбол алаңдары пайдалануға берілген. Бүгінде 14 мектепте 16 спорт залы, балалар-жасөспірімдер спорт мектебінде 2 зал, Ақсуат колледжінде 1 зал, ал дене шынықтыру-сауықтыру кешенінде 2 спорт залы тұрғындар игілігіне қызмет көрсетуде. Аудан аумағында 26 ашық спорт және балалар алаңы, 20 футбол алаңы, 3 воркаут алаңы, 1 стадион және 1 ипподром бар.
Ауданда дзюдо, қазақ күресі, гир спорты, шахмат, дойбы, тоғызқұмалақ, үстел теннисі, сондай-ақ волейбол, футбол, баскетбол сияқты командалық спорт түрлері жүйелі дамып келеді. Балалар-жасөспірімдер спорт мектебінде 840 бала тұрақты түрде жаттығады, оларға 40 бапкер-жаттықтырушы жетекшілік етеді. Соңғы үш жылда мектеп тәрбиеленушілері 80-нен астам жарыста жүлделі орындарға ие болып, аудан спортының беделін көтеріп жүр.
