Жуырда Семей мемлекеттік медициналық университеттің ректоры Төлебай Рахыпбековтің шақыруымен ұлт мақтаныштары, жерлестеріміз — қазіргі қазақ әдебиетінің көрнекті өкілі, өлең-сөздің хас шебері, Мемлекеттік және халықаралық «Алаш» сыйлықтарының иегері, ақын Ұлықбек Есдәулет, Қазақстан Республикасының еңбек сіңірген әртісі, дәулескер күйші, композитор Секен Тұрысбеков, республикалық және халықаралық байқаулардың жүлдегері, дәстүрлі әнші Ерлан Рысқали Ұлылар еліне арнайы келіп, университет студенттерімен «Жалынды өнер — жанға дауа» атты кездесу өтті.
{jcomments on}Салиқалы кешті жүргізу «Жырдауа» ақындар орталығының жетекшісі, айтыскер ақын Нұржан Өмірбаевтың еншісінде болды.
Бірнеше сағатқа созылған кездесу барысында жалпы медицина факультетінің 4 курс студенті Ақжігіт Қалибеков «Қазағым-ай» әнін шырқаса, Армия Гүлназ мәртебелі меймандарға арналған өлеңін оқып, әннен шашу шашты. Студенттер жарыса сұрақ қойып, ел ағаларының ыстық ықыласына бөленді.
Сонымен қатар мәртебелі меймандар құрылғанына 5 жыл болған «Жырдауа» ақындар орталығына ізгі тілек білдіріп, жыр жинақтарына қол таңбаларын беріп, жүрекжарды жырларын жазып қалдырды. Студенттердің ақ жарқын тілектеріне, шынайы қошеметтеріне разы бол-ған ұлт мақтаныштары университет ұжымына зор ризашылықтарын білдірді. Өз кезегінде Ұлықбек Есдәулет:
— «Асыл — тастан, ақыл — жастан», мен бүгін ерекше кештің куәсі болып отырмын. Бұрын мен медицина университетінің студенттері, оқытушылары тек ғылым-біліммен ғана айналысады деп ойлаушы едім. Бүгін, міне, сол ойымның теріске шыққанына өзім таң болып отырмын. Адамның жаны мен тәнін қатар емдеп жүрген жас-тарды көріп көңілім марқайып, ерекше толғаныста тұрмын. Осындай білімді де білікті жастарды тәрбиелеп отырған Төлебай Қосиябекұлына, «Жырдауа» ақындар орталығын құрып, жастарды жырға бөлеген жалпы медицина факультетінің деканы Әлия Ақанқызына ерекше алғысымды білдіргім келеді. Сіздерге шығармашылық табыс тілеймін, — дей келе, Төлебай Қосябекұлына өзінің кітабын сыйға тартты.
СММУ, жалпы медицина факультеті.
