Semeytany.kz – Абай облысының әкімі Берік Уәли Жапонияның Токио қаласында өткен XXV Сурдлимпиада ойындарында қола медаль иеленген дзюдошылар Алтынбек Кәкітаев пен Айым Жетпісбаева, сондай-ақ олардың жаттықтырушыларын қабылдап, облыс жұртшылығы атынан алғысын білдірді.
Кездесу барысында аймақ басшысы спортшыларды зор жетістіктерімен құттықтап, бұл жеңіс жылдар бойы жинақталған тәжірибе мен табанды еңбектің, мінез қайсарлығы мен кәсіби шеберліктің нәтижесі екенін атап өтті. Оның айтуынша, мүмкіндігі шектеулі жандар спортына мемлекет тарапынан ерекше көңіл бөлініп, бүкіл ел көлемінде қолдау шаралары жүйелі түрде іске асырылып келеді. Абай облысында да спорт инфрақұрылымын қолжетімді ету, талантты спортшыларды қолдау бағытында ауқымды жұмыстар жүргізілуде.
Берік Уәли Сурдлимпиада ойындарындағы жеңіс жеке жетістікпен қатар, Абай облысы мен жалпы Қазақстанның абыройын асқақтататын маңызды оқиға екенін айтып, мұндай табыстар жастарға жігер, өңір спортшыларына сенім сыйлайтынын жеткізді.
Облыс әкімі Алтынбек Кәкітаев пен Айым Жетпісбаеваға, сондай-ақ олардың жаттықтырушылары Мақсат Маралбайұлы мен Мәдина Елтайқызына Алғыс хаттар мен арнайы сертификаттар табыстады.
Абай ауданының Қарауыл ауылында дүниеге келген Алтынбек Кәкітаев соңғы жылдары ұлттық және халықаралық аренада тұрақты түрде топ жарып жүр. Ол 60 келі салмақта Қазақстан чемпионаты мен ҚР кубогында бірінші орын алған. 2024 жылы Әлем чемпионаты мен Азия–Тынық мұхиты ойындарының чемпионы атанып, ұлттық құраманың негізгі мүшесі ретінде ел намысын қорғауда.
Семей қаласының спортшысы Айым Жетпісбаева 48 келі салмақ дәрежесінде жоғары нәтижелерімен танылып жүр. 2024–2025 жылдары Қазақстан чемпионаты мен Кубогында бірінші орын иеленіп, Азия–Тынық мұхиты жарысында жүлдегер атанды. Бүгінде ол ұлттық құраманың негізгі спортшысы ретінде халықаралық додаларда өнер көрсетіп келеді.
