Semeytany.kz — Семей қаласында балаларға арналған жаңа футзал академиясын салу мәселесі облыс әкімі Берік Уәли мен «EA GROUP HOLDING» компаниясының өкілдері қатысқан кездесуде талқыланды.
Кездесуде инвесторлар Семейде әлемдік стандарттарға сай келетін жабық спорт кешенін салу жоспарын таныстырды. Жоба аясында балаларға арналған футзал академиясының базасында 400-500 баланың спортпен шұғылдануына мүмкіндік беретін жабық спорт кешені, оқу және медициналық блоктар, ашық спорт алаңдары мен демалыс аймақтары қарастырылған. Сондай-ақ бір мезетте 150 бала тұратын интернат салу көзделуде.
Аймақ басшысы Берік Уәли бұл бастаманың өңір спорты үшін ерекше маңызды екенін атап өтті. Оның айтуынша, Семей – қазақ футболының киелі мекені, бүгінгі таңда «Елімай» футбол клубы мен «Семей» футзал командасы жоғары деңгейде өнер көрсетіп жүр. Жаңа академия осы командалардың лайықты ізбасарларын даярлауға жағдай жасайды. Әкімдік тарапынан жобаға қажетті ұйымдастырушылық және инфрақұрылымдық қолдау көрсетілетіні айтылды.
«EA GROUP HOLDING» компаниясы бұған дейін де өңірдегі әлеуметтік және мәдени нысандарды қолдап келеді. Атап айтқанда, Семейдегі Невзоров атындағы музейге картина сатып алуға, Абай атындағы театрдың гастрольдік сапарларына жәрдемдескен. Сондай-ақ облыс орталығындағы мектептердің біріне жөндеу жұмыстарын жүргізуге үлес қосқан. Компанияның жаңа бастамасы Семейдегі спорт инфрақұрылымын дамытып, балалардың дене шынықтырумен кәсіби деңгейде айналысуына қосымша мүмкіндік бермек.
