Эпидемиялық маусым басталғалы қалада 24 458 жедел респираторлық вирустық инфекция (ЖРВИ) және тұмау жағдайы тіркелген. Бұл туралы
Өңірлік коммуникациялар қызметі алаңында өткен баспасөз мәслихатында Семей қалалық санитариялық-эпидемиологиялық бақылау басқармасының басшысы Шыңғыс Чокушев баяндады.
– Аурушаңдықтың 60%-дан астамын 14 жасқа дейінгі балалар құрайды. Барлығы 284 науқас стационарлық емге жатқызылды, оның ішінде пневмонияның 212 жағдайы анықталды. Қазан–қараша айларында вирустық спектр кеңейді. Вирусологиялық зертхана тұмау вирусымен қатар риновирус, аденовирус, боковирус, коронавирус және ортопневмовирус анықтады. 2025-2026 жылдардағы эпидемияға дейінгі маусымда Семей қаласында 35 270 адам тұмауға қарсы егілді, бұл жалпы халықтың 11,2% құрайды, – деді Шыңғыс Чокушев.
Сонымен қатар, Білім беру ұйымдарындағы шектеу шаралары туралы Семей қаласы білім беру бөлімінің басшысының орынбасары Ғалия Нұрғалиева кеңінен тарқатты.
– Қала бойынша 135 білім беру ұйымы жұмыс істейді, онда 61 395 бала білім алуда, оның ішінде 53 мемлекеттік және 7 жеке мектепте жалпы 54 167 оқушы оқиды. ҚР Бас мемлекеттік санитариялық дәрігерінің 2025 жылғы 22 тамыздағы №6-ПГСВ қаулысына сәйкес білім беру ұйымдарында күнделікті мониторинг, таңғы сүзгі, науқастарды оқшаулау, санитарлық талаптарды сақтау, профилактикалық іс-шаралар өткізу және персоналды оқыту қамтамасыз етілуде. Аурушаңдық өскен жағдайда кабинетаралық жүйе шектеледі, жаңа оқушыларды қабылдау тоқтатылады, ал бір сыныпта 30% оқушы ауырған жағдайда оқу онлайн форматына ауыстырылады. ҚР Оқу-ағарту министрінің №349 бұйрығына сәйкес 2025 жылғы 24 қарашадағы жағдай бойынша қаладағы 50 мектепте 594 сынып (13 495 оқушы) қашықтан оқытуға жіберілді, жалпы оқушы саны – 50 137, — деп атап өтті ол.
