Semeytany.kz – 2025 жылға арналған ерікті түрде қоныс аудару бағдарламасы аясында Абай облысына көшіп келетіндерге 499 адамға квота белгіленген. Оның 244-і – қандастар, 255-і – жұмыс күші артық өңірлерден қоныс аударатын азаматтар.
Облыстағы 331 елді мекеннің 316-сы қоныс қабылдайтын аумақ ретінде айқындалған. Қазіргі таңда өңірге 419 адам орнығып үлгерді. Соның ішінде 198-і – шетелден келген қандастар, 221-і – еліміздің басқа аймақтарынан көшкен ішкі мигранттар.
Ішкі көші-қон бойынша Абай облысына негізінен Астана қаласынан, сондай-ақ Түркістан, Жетісу және Алматы облыстарынан азаматтар қоныс аударуда. Ал қандастар Моңғолия, Қытай және Өзбекстан елдерінен көшіп келіп жатыр.
Бағдарлама шеңберінде келушілерге жалпы 226 миллион теңге көлемінде мемлекеттік қолдау көрсетілген. Берілетін әлеуметтік көмек бірнеше бағытты қамтиды: отағасына және отбасы мүшелерінің әрқайсысына 70 АЕК мөлшерінде бір реттік төлем, тұрғын үйді жалға алу және коммуналдық қызметтер шығынын өтеу үшін 15–30 АЕК көлеміндегі жәрдемақы, сондай-ақ баспана сатып алуға 50 пайызға дейін, бірақ 1160 АЕК-тен аспайтын көлемде тұрғын үй сертификаты қарастырылған.
Қоныс аударушылар мен қандастар қажет болған жағдайда қысқа мерзімді кәсіптік оқыту курстарына жіберіледі, мамандық меңгеріп, кейін тұрақты жұмысқа орналасуына қолдау көрсетіледі. Соның нәтижесінде бүгінгі күнге дейін 95 адам жұмыспен қамтылды.
Облыстық жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбектің айтуынша, еңбек ресурстарының ұтқырлығын арттыру үшін ақпараттық-түсіндіру жұмыстары жүйелі түрде жүргізілуде. Осы мақсатта Түркістан, Жамбыл, Алматы, Жетісу, Қызылорда, Маңғыстау облыстарында, сондай-ақ Шымкент, Алматы және Астана қалаларында қоныс аудару жәрмеңкелері ұйымдастырылған.
Көші-қон саясатын іске асыру аясында 2023 жылы Семей қаласында бейімдеу және интеграция орталығы ашылды. Бұл орталық жаңа ортаға келген азаматтарға, әсіресе қандастарға жан-жақты көмек көрсетіп, тұрмыс-тіршілігіне бейімделуге жәрдемдеседі. Орталықта қазақ тілін және жазуын оқытатын арнайы бағдарламалар да қарастырылған.
