Семей қаласының әкімі Айбек Кәрімовтің жетекшілік етуімен “Нұр Отан” партиясы Семей қалалық филиалының кезектен тыс ХХ конференциясы өтті. Жиынға партияның саяси кеңес мүшелері, бастауыш партия ұйымдарынан сайланған делегаттар, партия белсенділері, облыстық және қалалық мәслихат депутаттары, мемлекеттік мекеме басшылары, қоғамдық және жастар ұйымдарының жетекшілері қатысты.
{jcomments on}Күн тәртібінде “Нұр Отан” партиясы Шығыс Қазақстан облыстық филиалының конференциясына делегаттар сайлау туралы мәселе қаралды. Жиын барысында конференция делегаттарының өкілеттілігі туралы конференцияның мандат комиссия төрағасы Имдат Эфендиев баяндама жасады. Конференцияны ашқан “Нұр Отан” партиясы Семей қалалық филиалының төрағасы, Семей қаласының әкімі Айбек Кәрімов:
— Елбасы — партия Төрағасы Н.Ә.Назарбаев Астана қаласында 11 наурызда “Нұр Отан” партиясының XVI Съезін өткізу туралы қаулыға қол қойды. Партия жарғысына сай, барлық бастауыш партия ұйымдарымен және “Нұр Отан” партиясы Семей қалалық филиалымен жиындар өткізіліп, делегаттар анықталды, — деп атап өтті.
Жиында “Нұр Отан” партиясы облыстық филиалының конференциясына қалалық ұйымнан делегаттар ұсынылып, сайланды. Еске сала кетейік, Елбасы — партия Төрағасы Н.Ә.Назарбаев Астана қаласында 11 наурызда “Нұр Отан” партиясының XVI Съезін өткізу туралы Қаулыға қол қойған болатын.
Асан МЫРЗАХАНОВ,
“Семей таңы”
