Semeytany.kz — Абай облысының Бесқарағай ауданындағы Қарабас ауылында заманауи дәрігерлік амбулатория ашылып, ауыл тұрғындарын қабылдай бастады. Жаңа нысан ауыл халқының денсаулығын жақсартуға және медициналық көмектің қолжетімділігін арттыруға бағытталған.
Амбулатория «Ауылдық денсаулық сақтауды жаңғырту» ұлттық бағдарламасы аясында салынды. Осы бағдарлама шеңберінде ауданда барлығы 11 жаңа медициналық нысан іске қосылған. Олардың қатарында 4 дәрігерлік амбулатория, 1 фельдшерлік-акушерлік пункт және 6 медициналық пункт бар.
Қарабаста ашылған дәрігерлік амбулатория алғашқы медициналық-санитариялық көмекті сапалы көрсету үшін толық инфрақұрылыммен қамтамасыз етілген. Мұнда тұрғындарды қабылдау бөлмелері, медицина қызметкерлеріне арналған жұмыс кабинеттері, физиотерапия және процедуралық кабинеттер, сондай-ақ дәріханалық пункт жұмыс істейді.
Ғимарат заманауи медициналық техникамен жабдықталған. Амбулаторияда нейбулайзер, электрокардиограф, дефибриллятор, екі арналы сенсорлы магнитотерапия аппараты, спирометр және жоғарғы тыныс алу жолдарын ультракүлгін сәулемен емдеуге арналған құрылғы орнатылған. Бұл құрал-жабдықтар ауыл тұрғындарына дер кезінде диагностика жасап, қажетті ем-шараларды жүргізуге мүмкіндік береді.
Айта кетсек, өткен аптада ауданның Өндіріс ауылында да жаңа фельдшерлік пункт пайдалануға берілген еді. Жаңа нысандардың ашылуы Бесқарағай ауданында ауылдық медицина желісін нығайтуға және жергілікті тұрғындардың денсаулығын қорғауға елеулі үлес қосып отыр.
