Жақында орталық қалалық кітапханада «Мәдени мұра» мемлекеттік бағдарламасының кітап сериялары Қазақстан Республикасының Тұңғыш Президенті Нұрсұлтан Назарбаевтың бастамасы бойынша «Алтай-Ертіс» кітапханасы сериясынан шығарылған қаламгерлеріміздің таңдаулы шығармаларына арналған «Шығыстың жауһарлары» атты кітап көрмесінің тұсаукесері өткізілді.
«Алтай-Ертіс кітапханасы»-еліміздегі әдебиет саласындағы алғашқы көлемді өңірлік жаңа жоба.Оның іске асуына және көпшілік көңілінен шығуына елімізге танылуына мұрындық болған әрі өзінің қамқорлығын көрсеткен үлкен өнер жанашыры,ұлт жанды аймақ басшысы Бердібек Мәшбекұлы Сапарбаев. «Алтай-Ертіс кітапханасы» сериясынан шыққан кітаптардың тұсау кесеріне қаламыздағы Семей қаласының Шәкәрім атындағы мемлекеттік университетінің филология факультетінің 4 -курс студенттері, гуманитарлық-экономикалық колледж студенттері, сонымен қатар танымал әде- биетші, сыншы, өнер зерттеуші, ақын Төкен Ибрагимовтың қатысуымен өтті.
Мәдени іс-шараның басты мақсаты: өскелең ұрпаққа өңірімізде дүниеге келген халқымыздың біртуар тұлғалары, ардақты ақындары,қарымды қаламгерлерінің өмірі мен шығармашылық жолдарымен таныстыра отырып, әдебиетті, мәдениетімізді дәріптеп, насихаттау.
Шара барысында кітапхана қызметкері биылғы «Алтай-Ертіс кітапханасы» сериясынан шыққан 20 таңдаулы туындыға, соның ішінде қазақ әдебиетінің кемеңгері, дана Абай шығармаларының маржан сөздерімен, тамаша жинақтарынан бастау алған еңбектерге тоқталып, тамаша, дарынды қаламгерлеріміздің мұралары жайында да баяндап өтті.
«Алтай-Ертіс кітапханасының» екінші топтамасына Қ. Қайсенов, О.Бөкей, М.Сәрсеке, Қ.Жұмаділов, Т.Жұртбай, М.Ибраев, Б.Жақып, М.Қабанай, Т.Әбдікәкімов сынды қарымды қаламгерлер шығармалары енген.
Сонымен қатар заманауи техниканың көмегімен жасалған, ақын-жазушылардың қанатты сөздерінен арнайы дайындалған «Шығыстың рухани мұрасы» атты көлемді бейне көрініс көрсетілді.
Шақырылған қадірлі қонағымыз Төкен Ибрагимовке студенттеріміз, өздерінің сұрақтарын қойып,қаламгердің шығармашылығымен жан-жақты таныса отырып, көптеген мағлұмат алды.
Шара барысында, көркем сөздің шебері гуманитарлық — экономикалық колледж студенті Зейнешова Аяулым, Өр Алтайдың ақиық жазушысы Оралхан Бөкейдің «Апамның астауы» әңгімесінен монологты оқыса, Семей қаласының Шәкәрім атындағы мемлекеттік университетінің филология факультетінің 4-курс студентті Шеризат Арман жерлес ақынымыз Тыныштықбек Әбдікәкімовтың «Қара шал» өленің тебіренте жеткізді.Мәдени іс-шараға белсенділік танытып қатысқан жастарымызға, қадірменді қонағымыз Төкен Ибрагимов өз қаламынан шыққан «Жер әңгімеші» атты кітабын сыйға тарту етіп, алғыс-тілегін білдіріп, кітапхана қызметкерлеріне ризашылығын жеткізді. «Алтай-Ертіс кітапханасы» сериясымен ұсынылып отырған жинақтар оқырман жастарымыздың рухани игілігіне айналады деген сеніміміз мол.
Ж. ЖИЕНБАЕВА,
қалалық орталық кітапхананың кітапханашысы.
