Semeytany.kz — Абай облысында жол инфрақұрылымын дамыту мен жөндеу жұмыстарының барысы облыс әкімі Берік Уәлидің төрағалығымен өткен кеңейтілген аппараттық кеңесте қаралды. Жиында 2025 жылы жоспарланған жол құрылысы мен жөндеу жобаларының іске асырылу мәселелері сөз болды.
Кеңесте жолаушылар көлігі және автомобиль жолдары басқармасының басшысы Мерей Байырхан, «ҚазАвтоЖол» Ұлттық компаниясы» АҚ облыстық филиалының басшысы Айбек Әнуарбеков, сондай-ақ «Жол активтері сапасының ұлттық орталығы» РМК облыстық филиалының директоры Мейіржан Бауыржанұлы баяндама жасады.
Абай облысында жергілікті маңызы бар автомобиль жолдары мен елді мекен көшелерінің жалпы ұзындығы 8 052 шақырымды құрайды. Биылғы жылдың қорытындысы бойынша осы жолдардың нормативтік жағдайдағы үлесін 89 пайызға жеткізу жоспарланып отыр. Осы мақсатта жергілікті маңызы бар автомобиль жолдарын, елді мекен көшелерін, ондағы жол құрылымдарын жөндеу, күтіп-ұстау және құжаттама әзірлеу жұмыстарына әртүрлі деңгейдегі бюджеттерден 35,4 млрд теңге бөлінген. Биыл облыстық маңызы бар жолдардың 109 шақырымына орташа жөндеу жүргізілді.
Республикалық маңызы бар автомобиль жолдарының жалпы ұзындығы 2 176 шақырымды құрайды. Қазіргі уақытта ұзындығы 786 шақырым болатын 12 жоба іске асырылуда. Жыл басынан бері республикалық желі бойынша 12 зауытта 1,631 млн тонна асфальт өндіріліп, 390 шақырым жол учаскесі пайдалануға берілді. Жол құрылысына 8 мердігер ұйымнан 1 200 техника және 2 000-ға жуық жұмысшы тартылған.
«Жол активтері сапасының ұлттық орталығы» РМК облыстық филиалы жыл басынан бері республикалық, облыстық, аудандық маңызы бар автомобиль жолдары мен көше-жол желісі нысандарына 79 рет шығып, барлығы 501 бақылау тексерісін жүргізген. Нәтижесінде 3 304 сынама алынып, жол жұмыстарының сапасы зертханалық тұрғыда тексерілді.
Жиын барысында аймақ басшысы елді мекендердегі жолдардың нақты жағдайы бойынша толық талдау әзірлеуді, Полиция департаментімен бірлесе отырып жол қауіпсіздігін күшейтуді тапсырды. Сондай-ақ жөндеу жұмыстарын бекітілген кестеге сай аяқтаудың маңыздылығын атап өтті.
– Қаралып отырған мәселе – аса өзекті. Өңірдегі жолдардың сапасына тұрғындар тарапынан сын көп. Біздің басты міндетіміз – облыстағы асфальтталған жолдың үлесін ұлғайтып, жол қауіпсіздігін қамтамасыз ету. Бұл бағытта барлық жауапты мекемелер бірлесе, жүйелі түрде жұмыс істеуі керек, – деді Берік Уәли.
