Сәрсенбі күні Шығыс Қазақстан облысы студенттер Альянсы және қаланың белсенді жастарының ұйымдастыруымен Қазақстан халқы Ассамблеясының мерзімінен бұрын Қазақстан Республикасының Президенті сайлауын өткізу туралы бастамасын қолдау және қала тұрғындарын сайлауға бір кісідей қатысуға шақыру мақсатында автошеру өтті.
{jcomments on}Аталмыш іс-шара Шығыс Қазақстан облысы студенттер Альянсы және «Mansory Club Semey» автоәуесқойлар қозғалысының белсенді жастарының М.Әуезов атындағы алаңда жиналып, қала тұрғындарына Жеңістің 70 жылдығына арналған арнайы ұлттық ою-өрнекпен әшекейленген ленталарды тарату акциясынан бастау алды.
— 26 сәуірде болатын Қазақстан Республикасы Президентін сайлауға қала жастарын бір кісідей жұмыла қатысуға шақырамыз. Статистикалық мәліметтерге сүйенсек, өңірімізде жастардың үлесі 24 пайызды құрайды. Сондықтан біздің жастардың осы сайлауға қатысуы ең бірінші негізгі көрсеткіш болып табылады. Осы шараны ұйымдастыру арқылы біз өзіміздің белсенді екенімізді және де болашаққа зор үмітпен қарайтынымызды білдіргіміз келеді. Бұл бастамамыз қаланың барлық жастарына үлгі-өнеге болады деп ойлаймыз. Біз осылайша сайлауды қолдайтынымызды және сайлауда бір адамдай дауыс беретінімізді көрсетпекпіз, — дейді Шығыс Қазақстан облысы студенттер Альянсының республикалық көшбасшысы Мұстафа Қожамсейіт.
Мемлекеттік тулармен безендірілген автокөліктер аспалы көпір арқылы қаланың орталық көшелерімен жүріп, тұрғындарды сайлауға белсене қатысуға шақырды.
Автошеру бағыты бойынша жол жиегінде тұрған жастардан құралған «Пит стоп» автокеруенді жалынды ұрандармен қарсы алды. Автошеру Түйемойнақ аралындағы «Өлімнен де күшті» монументі алдында екі жүзден астам жастардың қошеметтеп қарсы алуымен мәресіне жетті. Жастар кезектен тыс сайлауға қолдау білдіріп, еліміздің болашағы, тұрақтылығы мен экономикалық өркендеуі үшін бір кісідей сайлауға қатысуға үндеді.
— Еліміздің қарқынды түрде дамуы мен болашағы, сонымен қатар алға қойған мақсаттар да Қазақстан Республикасы Президентінің сайлауына және сайлауға қатысқан әр дауыс берушіге тікелей байланысты болатыны анық. Сондықтан мен қаламыздағы барлық жастарды алдағы 26 сәуір күні өтетін Қазақстан Республикасы Президентін сайлауға бір адамдай қатысуға шақырамын, — дейді Шығыс Қазақстан облысы студенттер Альянсының мүшесі, қаланың белсенді жастарының бірі Әйгерім Айдарханова.
Нұрдәулет КӘКІШЕВ,
«Семей таңы»
