Нәзік жандылардың төл мерекесі қарсаңында «Нұр Отан» партиясы Семей қалалық филиалының атынан №3 аралас үлгідегі емхананың бас дәрігері Нәйля Әлменова мен осы емхананың аға медбикесі Күлән Искакова және «Жас Отан» жастар қанатының мүшелері соғыс ардагері Раиса Денисованың шаңырағына құттықтай барды.
{jcomments on}Соғыс басталғанда, Раиса әжей бар болғаны 15 жаста ғана еді. Өжет қыз өз еркімен 1943 жылы соғысқа сұранып, әскери әуе күштері құрамына алынып, әуе шайқастырында зақымданған ұшақтарды қалыпқа келтіру жұмыстарын атқарған. Өзінің еңбекқорлығымен ерекшеленген Раиса Александровна Ленинград, Сталинград сынды ірі қалаларды азат етуге қатысады. Еңбегі мен ерлігі еленіп, ІІ дәрежелі Отан соғысы орденімен, «Жуков» медалімен, «Сталинградты азат еткені үшін» және өзге медальдармен марапатталған.
— Соғыс ешкімді де аяған жоқ. Қандай қиыншылық болмасын, соңымызда еліміз тұрғанын ескеріп, рухымызды сөндіріп, нәзіктігімізді байқатпадық. Ауыр жараланған, тіпті көз жұмған қатарластарымызды көргенде де әлсіздікке жол бермедік. Бізде «жауды жеңу» деген жалғыз мақсат болды, — дейді сұрапыл жылдарды еске алған ардагер.
Соғыс аяқталған соң да Раиса әжей тұралап қалған ел тұрмысын түлетуге атсалысқан. Саналы ғұмырын еңбекпен өрнектеп, «Мирас» кәсіпорнынан құрметті демалысқа шыққан.
Қарт майдангер ананы құттықтай келген қауым бір құшақ гүл мен арнайы әзірлеген сый — сияпаттарын тарту етті.
— Ардагерлерді ардақтауды еш уақытта ұмыт қалдырмай, қолдау танытып отыратын Елбасымыз Н.Ә.Назарбаевқа айтар алғысым шексіз. Бейбіт аспан астында баянды ғұмыр кеше берейік. Ұрпақтарымыз соғыстың не екенін білмей-ақ қойсын,- деді Раиса әжей құттықтаушыларға алғысын білдіріп.
Әйгерім СӘРСЕНҒАЛИ,
«Семей таңы»
