Аягөз қаласындағы аудандық балалар және жасөспірімдер спорт мектебінде «Дені сау ұрпақ — ұлт болашағы» деген атпен акция өтті. Аудандық жастар орталығының ұйытқы болуымен ұйымдастырылған шараға ауданның белсенді жастары, қала мектептерінің жоғары сынып оқушылары, Аягөз жастар Альянсы ұйымының мүшелері мен спорт мектебінің тәрбиеленушілері қатысты.
{jcomments on}Акцияның ашылу салтанатында аудан әкімінің орынбасары Сейілбек Ысқақов салауатты өмір салтын ұстанудың үлкен мәнге ие екенін тілге тиек ете келе, жиналған қауымға өзінің тілегін білдірді. Өз кезегінде сөз сөйлеген Шығыс Қазақстан облысының ең үздік боксшысы Құрманғазы Асқаров жастарды спортпен айналысуға шақырды.
Аудандағы өскелең ұрпақты салауатты өмір салтына баулу, олардың арасында спортпен шұғылдануды насихаттау, жастар мәдениетін қалыптастыру ұйымдастырылған акцияның негізгі мақсат-міндеттері, міне, осындай. Ал идеясы — музыка, би өнері арқылы салауатты өмір салтын дәріптеу, өрендерді нашақорлық сияқты зиянды әдеттерден аулақ болуға шақыру.
«Халықтың салауатты өмір салты мен денсаулық сақтау мәселелері жөніндегі білімі мен хабардарлығын арттыра беру — міндет. Халық арасында спорттың бұқаралық сипат алуына және спортты насихаттауға ерекше ден қою керек» — деп, Елбасы Нұрсұлтан Назарбаев айтқандай, өскелең ұрпақ еліміздің ертеңі болғандықтан, осындай акцияларды көптеп ұйымдастыру жастардың салауатты өмір салтын ұстануына, дене тәрбиесімен айналысып, спортпен шұғылдануына өз септігін тигізері сөзсіз.
С. ИБРАЕВ,
Аягөз аудандық жастар орталығының директоры.
