{jcomments on}Қапанбұлақ ауылында «Туған жерге тағзым» және «Туған ел — алтын бесігім» акциялары аясында өрелі істер жалғасын тауып, шарапатын дарытып, өркен жайып келеді. Тақауда өнерімен ШҚО жұртшылығына мәлім Қапанбұлақ ауылының тумасы, Т.Хасенұлы атындағы орта мектебінің түлегі, жасынан өнерге деген зор ынтасының арқасында жерлестерінің мақтанышына айналған «Биоритм» ансамблінің әншісі, «Әлем» орталығының басшысы Әлемгүл Ерменбаева «Шығыс жұлдызы» байқауының І орын иегері, Болгарияда өткен «Трикси» фестивалінің жеңімпазы, Түркия «Күміс жұлдызы» атағының иегері, Вен балының ханшайымы Әсем қызымен бірге өзі білім алған мектебінің акт залында көрермендерге жанұясымен әдеби-музыкалық концерттік бағдарламасын ұсынды. Әлемгүл Тәңірбердіқызы жұртшылықты «Әлем» тобымен таныстырып, туған жеріне деген сағыныш орнын толтырып, мың бұралған биімен, әсем әнімен жұртшылықты тәнті етіп, жерлестерін шаттыққа бөледі. Ауыл жұрты әнші қыздары Әлемгүл мен Әсемнің концерттік бағдарламасын тамашалап, әндерін тыңдап, өнерпаздардың өнеріне алғыстарын жаудырып, жақсы көңіл-күймен демалып қайтты. Кештің өтуіне атсалысқан мектеп директоры Ерлан Жұмаханұлы өз кезегінде мектеп түлегі Әлемгүл Тәңірбердіқызына ауыл тұрғындары атынан алғыс айтып, шығармашылық табыс тіледі.
Г. АМАНБАЕВА,
Қапанбұлақ ауылы, Жарма ауданы.
