Semeytany.kz – Абай облысының әкімі Берік Уәли Аягөз ауданына жұмыс сапары барысында Малтүгел ауылында жаңадан салынған медициналық пункттің жұмысымен танысты. Ауыл тұрғындары үшін алғаш рет ашылған бұл нысан «Ауылдық денсаулық сақтауды жаңғырту» ұлттық жобасы аясында биыл пайдалануға берілген.
Малтүгелдегі медициналық пунктке қазіргі таңда 139 тұрғын тіркелген. Жалпы аумағы 60,5 шаршы метр болатын ғимаратта дәрігерге дейінгі және алғашқы медициналық-санитарлық көмек көрсетіледі. Сондай-ақ ересектер мен балаларға консультациялық-диагностикалық қызмет, шұғыл және жоспарлы көмек, профилактикалық тексерулер, акушерлік-гинекологиялық көмек түрлері қарастырылған.
Медициналық пунктте үш маман еңбек етеді. Нысан Тарбағатай дәрігерлік амбулаториясының құрамына кіреді және амбулатория есебінен санитарлық автокөлікпен қамтамасыз етілген. Медициналық пункт ауылдағы тұрғындардан бөлек, Малтүгелге жақын орналасқан қыстақтарға да қызмет көрсетеді. Заманауи талапқа сай салынған ғимарат бүгінде ауыл халқына сапалы медициналық қызмет ұсынуда.
Ауыл тұрғындары жаңа нысанның маңызын атап өтті.
– Бұған дейін ауылымызда мұндай медициналық нысан болған емес. Соңғы отыз жылда жаңа ғимарат салынбаған еді. Биыл бой көтерген медициналық пункт ауылдың ажарын ашып, бізге үлкен қуаныш сыйлады. Осында келіп, тексеруден өтеміз. Іші жылы, заманауи үлгіде салынған. Ауыл тұрғындары атынан ризашылығымызды білдіреміз, – деді Малтүгел ауылының тұрғыны Ахметбек Мүрсәлім.
Аймақ басшысы да ауылдықтар үшін медициналық көмектің қолжетімді болуы басты назарда екенін айтты. Оның айтуынша, Аягөз ауданында «Ауылдық денсаулық сақтауды жаңғырту» ұлттық жобасы аясында жеті медициналық нысан іске қосылған, солардың бірі – Малтүгелдегі жаңа пункт.
– Медициналық мекемені арнайы келіп көрдім. Заманауи үлгіде, талапқа сай салынған екен. Жұмыстарыңызға сәттілік тілеймін, – деді Берік Уәли.
Сапар барысында ауыл тұрғындары облыс әкіміне жол жөндеу, ауыз сумен қамтамасыз ету және интернет желісін орнату мәселелерін де көтерді. Аймақ басшысы бұл сұрақтардың назардан тыс қалмайтынын, кезең-кезеңімен шешілетінін атап өтті.
