Semeytany.kz – Абай облысының әкімі Берік Уәли Аягөз ауданына қарасты Тарбағатай ауылына барып, жергілікті тұрғындармен жүздесіп, ауылдағы өзекті мәселелерді талқылады. Кездесуде әлеуметтік инфрақұрылымды дамыту, көлік қатынасы мен коммуналдық қызметтерді жақсарту жайы қозғалды.
Кездесу барысында ауыл тұрғындары бірнеше маңызды өтінішін жеткізді. Атап айтқанда, елді мекенге бас дәрігер тағайындау, учаскелік полиция пунктін ашу, Аягөз қаласы мен Тарбағатай ауылының арасында тұрақты автобус қатынасын жолға қою, жеңілдетілген несие алуға мүмкіндік жасау, сондай-ақ ауылдың төменгі бөлігіне ауыз су тарту қажеттігі сөз болды.
Берік Уәли Тарбағатайдың мәселелерінен хабардар екенін айтып, оларды кезең-кезеңімен шешуге уәде берді. «Тарбағатай — тоғыз жолдың торабында орналасқан, береке-бірлігі мығым, тарихы терең ауыл. Негізгі кәсібі – мал шаруашылығы. Біздің мақсат – ауылдағы тұрмыс сапасын жақсарту. Айтылған ұсыныстар бойынша тиісті жұмыстар атқарылады. Су мәселесін шешіп, балаларға арналған ойын алаңдарын орнатамыз, мектепке ағымдағы жөндеу жүргізіледі. Биыл республикалық маңызы бар «Қарағанды – Боғас» жолының 18 шақырымы жөнделді, келесі жылы тағы 60 шақырымнан астам бөлігін қалпына келтіру жоспарланып отыр», – деді облыс әкімі.
Сапар аясында аймақ басшысы Тарбағатай ауылындағы жалпы орта білім беретін мектепке де барды. Мектептің асханасын, спорт залын, оқу кабинеттерін қарап шығып, мұғалімдермен және оқушылармен әңгімелесті. 1981 жылы пайдалануға берілген білім ордасында бүгінде 228 оқушы оқиды, 81 адам еңбек етеді. Облыс әкімі білім беру нысанының материалдық-техникалық базасын жақсарту да назардан тыс қалмайтынын атап өтті.
