Көкжайық ауылы мектебінің жаңа спорт кешенінде Ауған соғысында ерлікпен қаза тапқан әскери Қызыл Жұлдыз орденінің иегері Нұрсолтан Разақовты еске алуға арналған волейболдан дәстүрлі жарыс өткізілді.
{jcomments on}Жарысқа аудан аумағынан 9 команда қатысты. Нәтижесінде І орынды Көкжайық ауылының волейбол командасы жеңіп алса, ІІ орынды қарағандыкөлдік жастар командасы еншіледі. Ал ІІІ орынға өздерінің әлі де қалыпта екенін көрсетіп волейбол алаңына шыққан улкенбөкендік Мұрат Төлебаев, Борис Растрига, Думан Каргенов, Серікхан Абижанов, Қайрат Ахметқалиев және Ауған соғысының ардагері Дүйсен Елубаев сынды азаматтар ие болды. Олардың ойыны көкпектілік волейболдың нағыз шеберлік сыныбы болды. Жарыстың үздік ойыншысы көкжайықтық Дамир Әкімов болса, үздік ша-буылшы қарағандыкөлдік Досхан Мусин, үздік қорғаушылар мамайлық Архат Оралханов пен преображенкалық Болат Жармуханбетов болды.
Жүлдегер командаларға, үздік ойыншыларға мақтау қағаздары, бағалы сыйлықтар тапсырылды. Биылғы жылғы жарыстың өтуіне ауылдық әкімшілік, «Елім-ай Көкпекті» ЖШС басшылары ағайынды Түсіпбай және Болат Бекбердиновтер және ауыл түлектері Қыдыр Әбетаев, Қайрат Далабаевтар демеушілік көрсетті. Дәстүрлі жарыс аяқталғаннан кейін, Ауған соғысында шейіт болған Нұрсолтан Разақовқа арналып ас беріліп, қатым түсірілді.
Жарыстың ашылуы барысында аудандағы мәдениет қайраткері, ардагер әртіс Төкен Асылханов Нұрсолтан Разақовқа арнау өлеңін оқыды.
Дәстүрлі түрде 1988 жылдан бері өтіп келе жатқан Нұрсолтан Разақовқа арналған бұл турнир жас ұрпақты салауатты өмір салтына баулитын тәрбие-лік мәні зор іс екенін, оны жалғастыру үлкен міңдет екенін айтады ауылдық округ әкімі Нұрбек Сүлейменов.
Қайрат МАЛҒАЖДАРОВ,
Көкпекті ауданы.
