Semeytany.kz – Абай облысының әкімі Берік Уәли Аягөз ауданындағы «Қозы Көрпеш – Баян сұлу» кесенесіне баратын жол бойындағы көпірдің қазіргі жағдайын қарап, нысанды қалпына келтіру жоспарларымен танысты.
Тарлаулы ауылдық округі маңында орналасқан бұл көпір 2014 жылы салынған. Елдімекенде 1398 тұрғын бар. Көпірдің ұзындығы 10 метр, ені 8 метр, биіктігі 3 метрді құрайды. 2024 жылдың наурызында Аягөз өзеніндегі судың күрт көтерілуі салдарынан көпір зақымданған. Осы оқиғадан кейін аудандағы Тарлаулы көпірін қоса алғанда, 9 көпірге техникалық тексеру жүргізіліп, сараптама қортындысына сәйкес нысанның жалпы техникалық жай-күйі апатты деп танылды.
Қазір көпірді қайта салуға арналған жобалық-сметалық құжаттама әзірленіп жатыр. Жобалау жұмыстарын 31 желтоқсанға дейін аяқтау көзделген. Аймақ басшысы құжаттама толық дайын болған соң келесі жылы қаржы қарастырылып, көпірдің құрылысы басталатынын атап өтті. Оның айтуынша, «Қозы Көрпеш – Баян сұлу» кесенесіне келушілер көп болғандықтан, тарихи орынға апарар жол барлық талапқа сай, қауіпсіз болуы тиіс.
Көпірдің жай-күйімен танысқаннан кейін облыс әкімі Берік Уәли Тарлаулы ауылдық округі маңындағы «Қозы Көрпеш – Баян сұлу» кесенесіне барды. VIII–IX ғасырлардан сақталған бұл махаббат мазары – республикалық маңызы бар тарихи-мәдени ескерткіш. Биіктігі 12 метр болатын, табиғи тастан қаланған төрт қырлы көне күмбез ерекше тарихи жәдігер ретінде бағаланады. 2002 жылы нысанға ғылыми-реставрациялық жұмыстар жүргізіліп, кесене қалпына келтірілген.
Кесене Тарлаулы ауылынан оңтүстік-батысқа қарай 6 шақырым жерде орналасқан. 2014 жылы ескерткішке баратын 13 шақырымдық асфальт жол төселіп, Аягөз өзенінен өтетін көпір салынғаннан кейін туристік бағыттың инфрақұрылымы жақсарған. Бүгінде кесене республикалық маңызы бар тарихи нысан мәртебесіне ие.
