Semeytany.kz – Аягөз ауданының Тарлаулы ауылындағы К.Қадыржанов атындағы Қызылқия жалпы орта мектебі толық күрделі жөндеуден өтті. Бүгін білім ошағына Абай облысының әкімі Берік Уәли арнайы барып, жаңарған мектептің жағдайымен танысты.
1985 жылы ашылған мектепте қазіргі таңда 196 оқушы білім алып, 38 мұғалім еңбек етеді. Аймақ басшысы оқу кабинеттерін аралап, білім ордасының материалдық-техникалық базасын көрді. Биыл республикалық бюджет есебінен ғимаратқа толық күрделі жөндеу жүргізіліп, физика, бастауыш сынып, биология, робототехника және STEM пән кабинеттері жаңа жабдықтармен қамтамасыз етілді.
Жөндеу және жабдықтау жұмыстары аяқталғаннан кейін үнемделген қаржы есебінен мектепке қосымша 4 интерактивті тақта, 48 парта, 98 орындық, 10 шкаф, 10 мұғалім үстелі алынды. Кітапханаға жаңа сөрелер орнатылып, мәжіліс залы мен мұғалімдер бөлмесі де жиһазбен толықты. Мектептің ауласы асфальтталып, алды-арты толық қоршалды, осылайша оқу орнының материалдық-техникалық базасы кешенді түрде жаңартылды.
Мектеп директоры Кенжегүл Ешмұратова күрделі жөндеу жұмыстары білім ұясы тарихында алғаш рет кең ауқымда жүргізілгенін атап өтіп, ғимараттың іші-сырты жаңарып, асхана, акт залы, пән кабинеттері мен дәліздердің түгел жаңаруы ауыл тұрғындары үшін үлкен қуаныш екенін жеткізді. Оның айтуынша, ең бастысы – балаларға заманауи, жайлы әрі қауіпсіз ортада білім алуға жағдай жасалды.
Берік Уәли жаңартылған кабинет жиһаздарын, мәжіліс залын, оқу бөлмелерінің жарықтандырылуын көріп, мектептің бүгінгі келбеті ауыл балаларына сапалы білім беруге үлкен мүмкіндік ашатынын айтты. Облыс әкімі білім беру инфрақұрылымын жаңарту – балалардың жарқын болашағына салынған маңызды инвестиция екенін атап өтіп, ендігі міндет – осы мүмкіндікті тиімді пайдаланып, оқу сапасын арттыру екенін жеткізді. Сондай-ақ, келесі жылы Тарлаулы ауылындағы бес көшені жөндеу жоспарланып отырғанын, елді мекенді қолдау бағытындағы жұмыстар жалғасатынын қоса айтты.
