Аудан әкімі Нұрлан Сыдықов аудандық ауруханаға барып, ондағы атқарылып жатқан жұмыстармен танысты. Аудандық аурухананың бас дәрігері Б.Абылқасымов ең алдымен аудан әкімін толықтай күрделі жөңдеуден өткізіліп, жаңа қалыпқа ие болған аурухана жанындағы емханамен таныстырды.
{jcomments on}Мұнда өткен жылдың мамыр-желтоқсан айлары аралығында жөндеу жұмыстары жүргізілген. Жөндеу жұмыстарына облыстық бюджеттен 62416,0 млн. теңге қаржы бөлінген екен. Жөндеу жұмыстарын жүргізген «ПромЭлектросвязь» ЖШС мердігер компания өкілдері, сметалық құжаттамада қарастырылмаса да, 1 қабаттағы жөндеу жұмыстарын құрылыс компаниясы есебінен жүргізгендігін баяндады. Бұл жерде емхана басшысының да табандылығы мен өз жұмысына деген үлкен жауапкершілігі аңғарылды. Жүргізілген күрделі жөндеуден кейін ғимарат барлық талаптар мен нормаларға сай қызмет атқаруда. Емхананың бас дәрігері аудан басшысын биылғы жылдың еншісіне енгізілген «Саламатты Қазақстан» мемлекеттік бағдарламасын іске асыру аясында бастапқы медициналық санитарлық көмекке көңіл бөлу, адам басына шаққандағы кешенді нормативті және ҚР Денсаулық сақтау министрлігінің порталдарын енгізу, тұрғындарға көрсетілетін кеңестік-диагностикалық көмектің қолжетімділігін және ашықтығын жақсарту, ана мен бала өлімін, қан айналым жүйелері аурушаңдықтарынан өлім-жітімді, онкологиялық аурушаңдықтарды, туберкулезді азайту бойынша іс-шараларды жалғастыру, ауыл тұрғындарын дәрі-дәрмектермен қамтамасыз етуді әрі қарай жетілдіру, «Ақпараттық Қазақстан -2020» мемлекеттік бағдарламасы аясында денсаулық сақтаудағы Бірыңғай ақпараттық жүйені әрі қарай дамыту, орталық аудандық аурухананың материалды-техникалық базасын жақсарту, аудан тұрғындарын 100 пайыз жылжымалы флюротексерумен қамтамасыз ету, медициналық, фельдшерлік-акушерлік пункттерді САНПИН талаптарына сай келетін ғимараттармен қамтамасыз ету сынды міндеттермен жіті таныстырып, осы бағытта атқарылған жұмыстарға да тоқталды.
Жаңаша күйге енген емханаға заманауи құрылғылар алынып қана қоймай, жиһаздары да жаңартылып, әр кабинетке интернет желісі енгізілген, яғни дәрігерлердің жұмыс жасауларына бүгінгі күні барлық жағдай қарастырылған. Әр дәрігердің кабинетіне бас сұққан аудан басшысы дәрігерлермен жүздесіп, жұмыс барысымен танысып, атқарылған істі көзімен көріп, көңілі толып, бас дәрігердің жұмысына оң бағасын берді. Әсіресе кадрлар мәселесінің оңды шешімін тауып, 13 жас дәрігерлердің жұмысқа қабылданғандығына риза болғанын жасырмады. Емхана ұжымының жұмысына жеміс тілеген аудан әкімі алдағы күнде де жақсы көрсеткіштерге қол жеткізу қажеттігін ескерді.
Әсел ҚАСЫМҒОЖИНА,
«Семей таңы»
