Тарбағатай ауданының әкімі Ділдабек Оразбаев аудан орталығы Ақсуатта, Ақжарда және Тұғылдағы Мәдениет үйінде салтанатты жиын өткізіп, әйел-аналарды көктемнің алғашқы күндерінде келетін шуақты мерекелерімен құттықтады. Қабылдауға кезінде тылда табысты еңбек еткен ардагер аналармен қатар, бүгінде осы өңірдің әр саласында шығармашылықпен жұмыс істеп, кәсіби шеберлігімен танылып жүрген қыз-келіншектер, мұғалімдер мен дәрігерлер, кәсіпкерлер, балықшылар, қолөнер шеберлері, спортшылар, ауыл әкімдері, ауыл шаруашылығының мамандары қатысты.
{jcomments on}Жиында аудан басшысы Ділдабек Оразбаев өз сөзінде әйел-аналардың қоғамдағы орны ерекше екеніне тоқталып, көп бала өсіріп, тәрбиелеп отырған аналарға «Алтын алқа», «Күміс алқа», мақтау қағаздарын және ауданның әлеуметтік-экономикалық дамуына сіңірген еңбегі үшін төсбелгілер табыс етті. Аудан өнерпаздары аналар мерекесіне арналған бағдарламамен концерт қойды.
Ділдабек Тәжібайұлы Ақсуатта тұратын 102 жастағы еңбек ардагері Күлсім Салқынбаеваның, еңбек ардагерлері Салтанат Тәкішеваның, Күлзия Ахметованың, Ақжар ауылының тұрғындары Жұпар Оспанбекова, Бұғи Шапатова, Зүбәш Жұматованың үйлеріне барып, мерекелерімен құттықтады. Сонымен қатар Тұғыл ауылында тұратын Александра Тельменева, Бижамал Әбдрахманова және Сағилаш Искакованы мерекелерімен құттықтап, бағалы сыйлықтар мен гүл ұсынды.
Бүкіл елімізде, ауданда, ауылдарда атқарылып жатқан берекелі істерден толық хабардар болып, немере, шөберелерінің ортасында бақытты өмірдің дәмін татып отырған жүз екі жастағы ақсуаттық Күлсім апа өзіне көрсетілген құрметке ризашылығын білдіріп, аналық ақ батасын берді.
Хамза СӘТИЕВ,
«Семей таңы»
