Елбасының «Нұрлы жол — болашаққа бастар жол» атты Жолдауын насихаттау, Қазақ хандығының 550 жылдығын, Қазақстан халқы Ассамблеясының, Қазақстан Республикасының Конституциясының 20 жылдығын, Жеңістің 70 жылдығын атап өту мақсатында Үржар ауданында идеологиялық керуен жұмыс жасауда. Аудан орталығынан шалғайда орналасқан ауыл тұрғындарын бағасы төмен халық тұтынатын тауарлармен қамтамасыз ету және халыққа кәсіби кеңес беру мақсатына жұмылған идеологиялық көшпелі керуен аудан басшысы Серік Зайнулдиннің тапсырмасы бойынша құрылған.
{jcomments on}Ақпан айының соңында сапарға шыққан керуен Тасбұлақ, Сағат, Қарабұйрат, Барлық-Арасан ауылдарында болды. Әр ауылға ат басын тіреген шақта керуенді бастап жүрген аудан әкімінің орынбасары Ж.Байсабыров жергілікті тұрғындарға Серік Зинабекұлының ыстық сәлемін жеткізді.
Шаралар барысында аудандық ішкі саясат бөлімінің бас маманы Е.Бейсенов Елбасының 2014 жылғы 11 қарашадағы «Нұрлы жол — болашаққа бастар жол» атты Жолдауын, Үкіметтің кеңейтілген отырысында айтылған мәселелерді халыққа кеңінен түсіндіріп өтіп, өз елінің патриоты болуы үшін «Қазақстанда жасалған» деген акция аясында өзімізде өндірілген өнімді тұтынуға шақырды. Ал аудандық Мәдениет үйінің өнерпаздары жиналған жұртшылықты өнерлерімен тәнті етіп, әсем әндерін шырқап, билерін орындады.
Тағы бір айта кетерлігі, жәрмеңке аясында аудандық дене шынықтыру және спорт бөлімінің басшысы С.Қабдолданов өзі мұрындық болып, әр ауылда ардагерлер, оқушылар және ауыл жастары арасында әртүрлі спорттық жарыстар өткізді.
Концерт соңы қызу жәрмеңкеге ұласып, ауылдықтар ауылшаруашылық өнімдері мен тұтыну тауарларын Үржар бағасымен сатып алу мүмкіндігіне ие болды. Өз кезегінде ауыл тұрғындары осындай бастама жалғасын таба берсе екен деген ниеттерін білдіріп, керуенді ұйымдастырған аудан басшылығына, бөлім басшыларына, мәдениет саласының қызметкерлеріне және БАҚ өкілдеріне жолдың ұзақтығына, күннің суықтығына қарамай келгендеріне алғыстарын айтып, игі тілектері мен жылы лебіздерін білдірді. Осылайша, идеологиялық жәрмеңке жұмысы жалғасып, әлі де үржарлық тұрғындармен қауышуда.
Бауыржан ЖАҚЫП,
«Семей таңы»
