Халықты сапалы ауыз сумен қамтамасыз ету мақсатында Жаңасемей ауданында жүйелі жұмыстар жүргізілуде. Бүгінде аудан аумағындағы 32 елді мекеннің 19-ы орталықтандырылған ауыз сумен толық қамтылған. Бұл туралы Өңірлік коммуникациялар қызметі алаңында өткен баспасөз мәслихатында Жаңасемей ауданының әкімі Нұржан Әбдікәрімов кеңінен тарқатты.
— Мемлекет Басшысының 2021 жылғы 1 қыркүйектегі халықты 100 пайыз ауыз сумен қамтамасыз ету жөніндегі тапсырмасын орындау аясында биыл Ақбұлақ ауылында сумен жабдықтау желілерінің құрылысы толық аяқталды. Нәтижесінде ауыл тұрғындары таза ауыз суға қол жеткізді. Сонымен қатар Алғабас ауылында су құбыры желілерін және бірінші көтерілімдегі ұңғыманы қайта жаңарту жұмыстары аяқталып, халыққа сапалы ауыз су берілді. Шаған кентінде де сумен жабдықтау желілерінің құрылысы толық аяқталып, пайдалануына берілді,- деп атап өтті спикер.
Қазіргі уақытта Приречное ауылында су құбыры желілерін қайта жаңғырту, сондай-ақ Талица ауылында су құбырының құрылыс жұмыстары жүргізілуде.
— Приречное ауылында қайта жаңғырту жұмыстары қарқынды жалғасуда: бүгінде 2 200 метр жер қазылып, 5 су құдығы орнатылды. Шақаман ауылында су құбыры желілерін салу және қолданыстағы желілерді жаңарту жұмыстары атқарылып жатыр. Аталған жұмыстарды желтоқсан айында аяқтау жоспарлануда, — деді аудан әкімі.
Нұржан Әбдікәрімовтың айтуынша, ауданда бұған қоса алты елді мекенде блок-модульдік станциялар орнатылған. Олар – Шоптығақ, Қыземшек, Жазық, Баженово, Климентьевка және Қаракөл ауылдары. Шоптығақ ауылындағы станция толық қуатта жұмыс істеуде. Климентьевка, Қыземшек және Қаракөл ауылдарындағы блок-модульдік станцияларды қайта қалпына келтіру жұмыстары толығымен аяқталды.
Бұл жұмыстар өңір тұрғындарын сапалы ауыз сумен қамтамасыз ету және инфрақұрылымдық дамыту бағытындағы кешенді жоспардың бір бөлігі болып табылады.
