Бегалин атындағы жалпы орта білім беретін мектептің қазақ тілі мен әдебиет пәнінің мұғалімі А.Умитжанова мен сурет пәні мұғалімі Е.Хасенов 9 «А» сынып оқушыларымен «Халқың сені сағынады» деген тақырыпта ақын, сазгер, ҚР Мәдениет қайраткері Сейтқали Қалыбековті еске алу кешін өткізді.
{jcomments on}Оқушыларды рухани құндылықтар негізінде тәрбиелеу, Абыралы аймағынан шыққан ақындар мен жазушылардың, өнер адамдарының шығармаларын кеңінен таныту, көркем поэзияға деген қызығушылықтарын ояту мақсатында ұйымдастырылған іс-шарада Абай ауданында, Абыралы өңірінде мәдениеттің өрістеп дамуына, Қайнар театрының өркендеуіне айрықша үлес қосып, еңбек сіңірген Сейтқали ағаның өмірі мен еңбек жолы шәкірттерге кеңінен таныстырылды.
Әрине, ақын — елдің, халықтың адамы. Өмірдегі кездесетін қуаныш та, мұң да, табиғат кереметтері де ақын жүрегінен көрініс табуы, тақырыбына арқау болуы – ол заңдылық. Көзі тірісінде ақын ағаның «Атыңнан айналайын, Абыралым» атты жыр жинағы жарық көріп, қалың оқырманға жол тартқан-ды. «Жақсының өзі өлсе де, сөзі өлмейді» дегендей, оқушылар осы жинақтан тума талант иесінің өлеңдерін жандарына жақын тұтып, мәнерлеп оқыды. 20-ға жуық ән жазған сазгердің бірнеше әндерін оқушылар Р.Бүркітбаев, Ү.Болатова тамылжыта шырқап, кештің шырайын кіргізе түсті. Е.Оспанов күмбірлете күй шертті. Ұстаз Б.Ташимовтың Сейтқали ақынға арнаған толғау өлеңін Ерасыл Оспанов мәнерлеп оқыды. Өз шығармашылығынан Б.Болатова мен Қ. Мылтықбековалар сазгер, ақынға арнау өлеңдерін оқып берді. Қай әнін тыңдасақ та, жүрегіңе сөзсіз өз әсерін қалдырмай, толғандырмай қоймайды, өзіне баурап әкетеді.
Оқушылар ақын, сазгер Сейтқалимен бірге жүріп, сыйлас болған орталық кітапхана жүйесі директоры Т.Ахметовтен, Пошта бөлімшесі басшысы Т.Сәлменовтен алған сұхбатты жиналғандарға слайд арқылы көрсетіп, естелік әңгімелерін тыңдатты.
Бұл кеште атақ, абыройдан кенде болмай, халықтың ыстық ықыласына бөленген, ақындығы, сазгерлігі, өнерпаздығы, қаламгерлігі топтасып келіп, елге танымал болған ағаның жүрек тербейтін, қиял қозғайтын, терең ойға шомылдыратын ғажап өлеңдерімен, әндерімен оқушылар кеңінен танысып, мол ғибрат алды деуге болады.
Кеште Сейтқали ағаның ұлы Жандос, әкесіне арнап еске алу іс-шарасын ұйымдастырғандары үшін, мектеп ұжымына, оқушыларға ризашылық алғысын жеткізді.
Мектеп директоры Б.Сарсенбеков өзінің ойлы пікірін білдіріп, білім ордасында әлі де талай мәнді де мағыналы, тағылымы мол іс-шаралар ұйымдастырыла беретінін айтты.
Қазима ҚАЖЫБЕКОВА,
«Семей таңы»
