Semeytany.kz – Абай ауданының Архат, Құндызды, Кеңгірбай би және Медеу ауылдарында су құбырларын қайта жаңғырту бойынша кешенді жұмыстар жүргізілуде. Жоба жергілікті тұрғындарды тұрақты әрі сапалы ауызсумен қамтамасыз етуге бағытталған.
Медеу ауылдық округінде су құбыры желісін тарту тамыз айында Мемлекеттің арнайы қорының қаржысы есебінен басталған. Жыл соңына дейін құрылыс толық аяқталып, нысанды пайдаланысқа беру жоспарланып отыр.
Қазіргі уақытта мұнда 5 техника, 25 жұмысшы жұмылдырылған. Елді мекенге су тарту жұмыстары толық аяқталып, су мұнарасы орнатылды. Сонымен қатар ұңғымаға қажетті сүзгі жүйесін орнату жұмыстары жүріп жатыр.
Инженерлік желілерді тартумен қатар, «Риза» шаруа қожалығының қатысуымен ауыл тұрғындарының үйлеріне су жүйесін кіргізу жұмыстары ұйымдастырылуда. Жоба толық аяқталғаннан кейін Медеу және басқа да ауылдарда тұрмыс сапасы артып, халықтың ауызсуға қолжетімділігі едәуір жақсара түспек.
