Биыл белгілі композитор, ұстаз, Қазақстанның еңбек сіңірген өнер қайраткері Теміржан Базарбаевтың дүниеге келгеніне 80 жыл толып отыр. Осы мерейтойлық датаға орай қалалық Мәдениет сарайында «Айдынды менің Ертісім» атты арнайы еске алу кеші өтті.
{jcomments on}Композитордың туғанына сексен жыл толуына орай ұйымдастырылған концерт басталмай тұрып өткізілген арнайы баспасөз мәслихатында Теміржан Базарбаевтың шәкірттері оның өнерге сіңірген еңбегі жайлы айтты. Осыдан тоғыз жыл бұрын дүние салған талант иесінің көзі тірісінде өзіндік мектебін қалыптастырғанын да атап өтті. Қазақстан Композиторлар одағының Ертіс өңірі бөлімшесінің төрағасы болғанын тілге тиек етті. Белгілі әнші, сазгер Аймұхамбет Бейсембеков ұстазы туралы:
— Темкеңнің есімі елге ерекше танылды. Нұрғиса Тілендиевтен «Қазақстан композиторлары арасынан кімді ерекше атар едіңіз?» — деп сұрағанда, ол кісі Мыңжасар Мамытаев пен осы Теміржан Базарбаев ағамызды атаған екен. Жалпы, Темкеңнің қазақ музыка өнеріндегі алатын орны ерекше,-деп сыр шертті. Сондай-ақ ол өзінің осы өнер саласына келуіне Теміржан Базарбаевтың тікелей ықпал еткеніне тоқталды.
Мұқан Төлебаев атындағы музыкалық училищеде қырық жылдан астам уақыт еңбек еткен біртуар азамат талай талантты жастарға білім береді. Композитордың шәкірттерінің арасында Жолдыбай Дәстенов, Мәуліт Рахымбаев, Тұрсынғазы Рахимов, Жанас Бекентұров, Болат Сыбанов сынды өнер майталмандары бар. Баспасөз мәслихатына қатысушылар кейінгі жылдары Семей өңірінен шыққан композиторлардың барлығын Теміржан Базарбаевтың шәкірттері деп атауға болатынын айтты.
«Айдынды менің Ертісім» деп аталған еске алу кешіне сазгердің аяулы жары Альфия апа қатысып, көрермен ретінде тамашалады. Концерт барысында композитордың «Қаздар қайтқанда», «Студенттік кештер», «Ауылым» сияқты танымал әндері шырқалды. Сондай-ақ симфониялық, опералық шығармаларынан үзінділер көрермен назарына ұсынылды. Мерейтойлық концерт барысында сахна төрінде сазгердің шәкірттерінің музыкалық туындылары да орындалды.
Мирас ҚҰСАЙЫН,
«Семей таңы»
