Semeytany.kz – Премьер-министрдің орынбасары Қанат Бозымбаев Абай облысына жұмыс сапары барысында «Абайға құрмет» республикалық акциясын іске асыру мәселелері бойынша кеңес өткізді. Мемлекет басшысының бастамасымен басталған акция ұлы ақын Абай Құнанбайұлының 180 жылдығына арналды. Жоба аясында еліміздің барлық өңірлері мен республикалық маңызы бар қалалар Абай облысына бір-бір әлеуметтік немесе мәдени нысан сыйға тартпақ.
Кеңесте ең алдымен Семей қаласының Бас жоспарына өзгерістер енгізу, арнайы экономикалық аймақ құру және жаңа нысандарды сол аумақпен ұштастыру мәселелері талқыланды. Жоспарға сай, АЭА құрамына 1200 гектар аумақты қамтитын жаңа әкімшілік-іскерлік орталық, заманауи тұрғын үй кешендері, 40-тан астам әкімшілік, коммерциялық және әлеуметтік нысан кіреді. Сондай-ақ Семейде жаңа инженерлік инфрақұрылым – қазандық, жылу, электр, су құбыры және кәріз желілерін салу міндеттері қарастырылды.
Қанат Бозымбаевтың айтуынша, «Абайға құрмет» акциясы аясында салынатын нысандар бір жағынан өңірдің әлеуметтік инфрақұрылымын жаңартуға, екінші жағынан Семейдің жаңа келбетін қалыптастыруға серпін береді. Бүгінде Абай облысының әкімдігі жобаларды нақтылау және жүзеге асыру бойынша өңірлермен бірлесіп жұмыс жүргізіп жатыр.
Алғашқы болып Маңғыстау облысы бастама көтеріп, Семейде Достық үйінің құрылысын бастап кетті. Түркістан облысы көрме орталығын, Қызылорда облысы «Анаға тағзым» ғимаратын, Атырау облысы «Абай әлемі» орталығын салады. Шымкент қаласы – Шығармашылық орталығын, Солтүстік Қазақстан облысы – Мемлекеттік рәміздер алаңын, Шығыс Қазақстан облысы – Ертіс өзенінің жағалауын абаттандыруды мойнына алды.
Ақтөбе облысы Жекпе-жек сарайын, Павлодар облысы үстел теннисі орталығын тұрғызады. Астана қаласы «Келешек» мектебін сыйға тартса, Алматы қаласы медиаорталық салуды жоспарлап отыр. Қарағанды облысы – ботаникалық бақ, Батыс Қазақстан облысы – желілік саябақ, Қостанай облысы – Руханият орталығын салып береді.
Кеңес барысында Премьер-министрдің орынбасары қалған өңірлерге де жобаларды айқындау және іске асыру жұмыстарын жеделдетуді тапсырды.
– Үйлестірілген жұмыстың нәтижесінде біз барлық жобаларды бірыңғай архитектуралық стильде сәтті аяқтап, Абай атына лайықты және өңірдің болашағы үшін маңызды инфрақұрылым құратынымызға сенімдімін, – деп атап өтті Қанат Бозымбаев.
Жүктелген міндеттерді тиімді және уақытылы орындау үшін ол Өнеркәсіп және құрылыс, Қаржы, Ұлттық экономика министрліктеріне, сондай-ақ өңірлердің әкімдеріне нақты тапсырмалар берді. Акция шеңберінде жоспарланған нысандар кезең-кезеңімен салынып, Семей қаласы мен жалпы Абай облысының әлеуметтік және мәдени инфрақұрылымын жаңа деңгейге көтеруі тиіс.
