Semeytany.kz – Бүгін облыс әкімі Берік Уәлидің төрағалығымен кеңейтілген аппараттық кеңес өтті. Жиында 2025 жылға арналған өңірлік жұмыспен қамту картасының орындалуы және желтоқсан айындағы мерекелік күндерге дайындық барысы қаралды.
Кеңес жұмысына облыстық басқармалар мен өңірлік департаменттердің басшылары қатысты. Аудан және қала әкімдері жиынға онлайн режимде қосылды. Күн тәртібіндегі мәселелер бойынша жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбек, ішкі саясат басқармасы басшысының орынбасары Гүлнұр Ыдырышева, мәдениет, тілдерді дамыту және архив ісі басқармасының басшысы Жанжігіт Омархан, сондай-ақ білім басқармасының басшысы Бауыржан Ердембеков баяндама жасады.
2025 жылғы 1 желтоқсандағы жағдай бойынша жұмыспен қамту картасы аясында облыста 24 925 адам жұмыспен қамтылған. Оның 16 211-і – тұрақты жұмысқа, 8 714-і – уақытша жұмысқа орналасқан. Жұмысқа тұрған азаматтардың басым бөлігі міндетті зейнетақы жарналарымен қамтылған, электрондық еңбек шарттарын енгізу жұмыстары жалғасуда.
Инфрақұрылымдық жобалар шеңберінде жыл басынан бері 1 648 адам жұмысқа тартылған. Бұл бағытта өңірдің әр ауданында тұрақты және уақытша жұмыс орындары ашылып, жұмысшыларды жаңа жобаларға қайта бағыттау жұмыстары жүргізілуде. Соның арқасында жоспарланған жұмыс орындарын сақтауға мүмкіндік туды.
Субсидияланатын жұмыс орындарына 7 486 адам жұмысқа орналасқан. Мемлекет басшысының «әрбір 10 мың тұрғынға 100 жаңа жұмыс орны» құру жөніндегі тапсырмасын орындау аясында облыста 9 049 адам жаңадан ашылған кәсіпорындарға жұмысқа қабылданды. Кәсіпорындар берген бос орындар арқылы тағы 6 476 азамат еңбекке тартылды.
Кәсіпкерлікті қолдау мақсатында өз бизнес-идеяларын жүзеге асырушыларға 205 грант берілді. «Дипломмен ауылға» жобасы аясында жас мамандарға жеңілдетілген несиелер ұсынылып, ауылдық жерлерге кадр тарту жалғасып жатыр. 2026 жылға арналған жоспарлау жұмыстары да басталған. Келесі жылы 3 977 жаңа жұмыс орнын ашу көзделуде, оның 3 167-сі – уақытша, 810-ы – тұрақты жұмыс орны болмақ.
Жиында облыс әкімі аудан және қала әкімдеріне жылдық жоспарды толық орындауды, инфрақұрылымдық жобалар аясында жоспарланған жұмыс орындарын ашуды, «әрбір 10 мың тұрғынға 100 жаңа жұмыс орны» көрсеткішін уақтылы қамтамасыз етуді тапсырды. Сондай-ақ азаматтарды электрондық еңбек шартымен қамтуға қатысты нақты шаралар қабылдап, міндетті зейнетақы жарналары бойынша анықталған бұзушылықтарды жою керектігін айтты.
Аппараттық кеңесте желтоқсан айындағы мерекелік іс-шараларға дайындық мәселесі де қаралды. Тәуелсіздік күніне орай облысқа қарасты қала және аудандарда 100-ге жуық еске алу, танымдық, ғылыми-сараптамалық, білім беру, әлеуметтік және қайырымдылық бағыттағы шара өткізу жоспарланып отыр. Ал Жаңа жыл қарсаңында өңірде 120-ға жуық мерекелік іс-шара ұйымдастырылмақ.
Берік Уәли мерекелік безендіру жұмыстарын тәртіпке сай және белгіленген мерзімде аяқтауды тапсырды. Сондай-ақ Тәуелсіздік күні мен Жаңа жылға арналған шаралар кезінде қоғамдық тәртіпті, өрт қауіпсіздігін және медициналық қызмет көрсетуді жоғары деңгейде қамтамасыз ету қажеттігін атап өтті.
